Abertawe yn dathlu ond gêm ddi-sgor i Gaerdydd

  • 4 Rhagfyr 2013
Nathan Dyer celebrates scoring Image copyright Reuters
Image caption Nathan Dyer yn dathlu ar ôl sgorio

Abertawe 3-0 Newcastle United

Mae Abertawe yn dathlu ar ôl curo Newcastle United o 3-0 yn Stadiwm Liberty.

Roedd Newcastle wedi ennill pedair gêm yn olynol cyn y gêm nos Fercher.

Daeth y gôl gyntaf cyn yr hanner amser gan Nathan Dyer.

Mathieu Debuchy rwydodd yn ei gôl ei hun wedi i Tim Krul arbed ymdrech Jonjo Shelvey.

Ac wedi sawl bygythiad llwyddodd Shelvey i sgorio'r drydedd wedi 80 munud.

Mae'r fuddugoliaeth yn golygu bod Abertawe yn unfed ar ddeg yn y y tabl gyda 18 o bwyntiau.

Dywedodd rheolwr Newcastle Alan Pardew: "Chwaraeodd Abertawe'n wych ac nid oeddwn ni'n ddigon da.

"Fe wnaethon ni ein gorau yn yr ail hanner ond roedd dau benderfyniad yn ein herbyn ni."

Image copyright Getty Images
Image caption Pieters yn rhwystro ymdrech Whittingham

Caerdydd 0-0 Stoke

Gêm ddi-sgor oedd hi rhwng Caerdydd a Stoke sydd yn cael ei rheoli gan y Cymro Mark Hughes.

Roedd yn gêm ddi-fflach ar y cyfan heb arwydd yn aml y byddai un o'r ddau dîm yn sgorio yn ystod y 90 munud.

Ond yn y munudau ola' roedd Stoke bron â sgorio ond llwyddodd Marshall i arbed ymgais Adam.

Y pen arall Begovic rwystrodd Declan John rhag sgorio i Gaerdydd.

Cafodd pedwar chwaraewyr gerdyn melyn, Crouch, Adam, Turner a Campbell.

Dywedodd Mark Hughes: "Fe wnaethon ni reoli'r gêm yn dda. Ni oedd y rhai oedd yn debygol o sgorio.

"Roedd y canlyniad yn siomedig."

Dywedodd rheolwr Caerdydd Malky Mackay: "Roedden ni'n haeddu'r pwynt.

"Roedd hi'n mynd i fod yn her ac fe gafon ni ychydig o gyfleoedd."