Rhybudd melyn am lifogydd

Glaw
Image caption Gallai hyd at ddwy fodfedd neu 50mm o law ddisgyn mewn mannau

Mae'r Swyddfa Dywydd wedi cyhoeddi rhybudd melyn wrth i law trwm effeithio ar Gymru ddydd Iau.

Gallai cawodydd trwm symud o'r de i'r gogledd drwy gydol y dydd.

Y rhybudd melyn yw'r un i fod yn wyliadwrus.

"Fe allen ni weld dwy fodfedd neu 50 milimedr o law yn cwympo mewn ambell i le," meddai cyflwynydd tywydd Radio Cymru, Owain Wyn Evans.

'Cymryd pwyll'

"Y de a'r canolbarth yw'r llefydd mwya' tebygol o weld y glaw tryma' ac fe alle hyn arwain at lifogydd a thrafferthion ar y ffyrdd.

"Y cyngor yw cymryd pwyll ar y ffyrdd y prynhawn 'ma.

"Ond fe fydd hi'n troi rhywfaint yn sychach ymhellach i'r de erbyn diwedd y prynhawn cyn bod rhagor o law yn cyrraedd heno."

Dywedodd Cyfoeth Naturiol Cymru y gallai ffosydd a nentydd bychain orlifo.

Bydd y glaw yn effeithio ar bob rhan o'r wlad ond yn y de yn bennaf.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.