Cleverly'n colli ei deitl byd

  • 18 Awst 2013
Sergey Kovalev a Nathan Cleverly
Cafodd Cleverly ei daro i'r llawr am y tro cyntaf yn ei yrfa yn y drydedd rownd

Roedd hi'n noson gymysg i ddau focsiwr o Gymru yng Nghaerdydd nos Sadwrn.

Aflwyddiannus oedd ymdrech Nathan Cleverly i amddiffyn ei goron WBO is-drwm y byd wrth iddo golli yn y bedwaredd rownd i Sergey Kovalev o Rwsia.

Ond fe gafodd gyrfa Enzo Macarinelli ei adfywio wedi iddo ennill pencampwriaeth y Gymanwlad yn yr un pwysau wrth stopio'r deiliad Ovill McKenzie.

Cafodd Cleverly, 26 oed, ei daro i'r llawr am y tro cyntaf yn ei yrfa yn y drydedd rownd, ac roedd yr ornest ar ben i bob pwrpas o'r foment honno.

Roedd grym y Rwsiad Kovalev yn sylweddol, a dangosodd pam ei fod wedi ennill 18 o'i ornestau cyn nos Sadwrn o fewn y tair rownd gyntaf.

Fe barodd Cleverly ychydig hirach na hynny, ond doedd gan y dyfarnwr ddim dewis ond dod â'r ornest i ben yn y bedwaredd rownd wrth i Cleverly barhau i gael ei daro'n ddi-drugaredd.

Wedi'r ornest mynnodd Cleverly nad oedd rheswm iddo deimlo cywilydd, gan ychwanegu:

"Yn amlwg mae'n ofnadwy pan mae rhywbeth fel yna'n digwydd.

"Ond i fod yn deg i Kovalev mae ganddo ergyd galed iawn.

Enzo Maccarinelli
Enzo Macarinelli'n dathlu ei fuddugoliaeth

"Mae'n ysgwyd ymennydd rhywun pan maen nhw'n glanio ar y pen, ac yn amlwg fe gadwodd y pwysau arnaf i."

Noson wahanol

Gallai'r noson ddim fod wedi bod yn fwy gwahanol i Macarinelli, 32 oed.

Roedd cyn-bencampwr gor-drwm y byd yn gwybod bod ei yrfa yn y fantol os na fyddai'n llwyddo i guro McKenzie - yr Americanwr a'i gurodd ym mis Tachwedd y llynedd.

Ar ôl goroesi pwysau gan McKenzie yn y rowndiau cynnar, fe roddodd Macarinelli reswm i'r dorf floeddio wrth ddod â'r ornest i ben yn rownd 11.

Bydd y fuddugoliaeth yn rhoi'r cyfle i Macarinelli ymgeisio unwaith eto am bencampwriaeth byd, a'r tro hwn bydd yn ymladd ar yr un pwysau â Cleverly.