Siom i Forgannwg yng nghystadleuaeth T20

Morgannwg
Image caption Bydd rhaid i Forgannwg guro Swydd Gaerloyw wedi iddyn nhw golli i Northampton

Swydd Northampton sydd wedi symud ymlaen i chwarteri'r gystadleuaeth 20 pelawd wedi buddugoliaeth gyfforddus dros Forgannwg yn Stadiwm Swalec nos Wener.

Roedd perfformiadau da gan Cameron White a Mohammad Azarullah yn ddigon i helpu Northampton guro o chwe wiced, gyda naw pêl yn weddill.

Bydd rhaid i Forgannwg guro Swydd Gaerloyw yng Nghaerdydd ddydd Mawrth os ydyn nhw am gyrraedd wyth olaf y gystadleuaeth.

Morgannwg oedd y cyntaf i fatio, gan gyrraedd 125 am naw wiced yn eu 20 pelawd. Cymrodd Azarullah bedair wiced am ond 16 o rediadau mewn pedair pelawd.

Chris Cooke oedd prif sgoriwr y tîm cartref, gan sgorio 50 o 38 pêl.

Roedd Swydd Northampton yn chwarae yn gyfforddus ar ddechrau eu batiad nhw, gan gyrraedd 21 heb golli wiced o fewn tair pelawd.

Callum White oedd seren yr ymwelwyr, gan sgorio 71 oddi ar 48 pêl i sicrhau buddugoliaeth gyda 9 pêl yn weddill.

Morgannwg 125-9 (20 pelawd)

Swydd Northampton 129-4 (18.3 pelawd)

Northampton wedi curo Morgannwg o chwe wiced.

Straeon perthnasol