Ieuan Wyn Jones i sefyll lawr fel AC

  • 17 Mehefin 2013
Ieuan Wyn Jones Image copyright Other
Image caption Arweiniodd Ieuan Wyn Jones ei blaid i mewn i glymblaid gyda Llafur yn 2007

Mae BBC Cymru wedi cael ar ddeall y bydd cyn arweinydd Plaid Cymru, Ieuan Wyn Jones, yn rhoi'r gorau iddi fel Aelod Cynulliad Ynys Môn.

Mae disgwyl iddo gyhoeddi ei fwriad fore dydd Mawrth, gan ddweud y bydd yn gadael y cynulliad ble mae wedi bod yn aelod ers 1999.

Y dyfalu yw ei fod yn dymuno dilyn gyrfa newydd, mewn maes gwahanol i wleidyddiaeth rheng flaen.

Byddai ei benderfyniad yn arwain at gynnal is-etholiad ar Ynys Môn.

Mae'r cyfreithiwr o Ddinbych wedi cael gyrfa wleidyddol o bwys yng Nghymru, gan gynrychioli Plaid Cymru yn San Steffan rhwng 1987 a 2001.

Cafodd ei ethol yn Llywydd y blaid yn Awst 2000, ar ôl i Dafydd Wigley ildio'r awenau oherwydd rhesymau meddygol.

Yna fe arweiniodd ei blaid i rannu grym gyda Llafur ym Mae Caerdydd wedi etholiad y Cynulliad yn 2007.

Daeth yn Ddirprwy Brif Weinidog a chafodd gyfrifoldeb am bortffolio pwysig yr economi o fewn y llywodraeth glymblaid.

Daeth ei gyfnod fel arweinydd Plaid Cymru i ben wedi canlyniadau siomedig y blaid yn etholiad y Cynulliad yn 2011.

Roedd nifer yn dweud fod y blaid wedi methu ag elwa o'u cyfnod fel partneriaid clymblaid.

Cafodd Mr Jones ei olynu gan Leanne Wood ym mis Mawrth y llynedd.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.