Tipyn o gamp

Gogledd Cymru 1404
Dim ond tair gêm gynghrair mae'r clwb wedi eu colli drwy gydol y tymor

Bydd Rygbi Gogledd Cymru 1404 yn gorffen y tymor ar frig Adran Un y Dwyrain wedi i Ystrad Rhondda golli yn erbyn Merthyr.

Mae hyn yn golygu y bydd y clwb o Gonwy yn y Bencampwriaeth y flwyddyn nesaf beth bynnag fydd canlyniad gêm olaf y tymor.

Honno yw'r gêm ym Mharc Eirias yn erbyn Rhydyfelin.

Dywedodd Dai Davies, Cadeirydd Rygbi Gogledd Cymru wrth BBC Cymru fod y dyrchafiad yn "newyddion bendigedig".

"Rydan ni wedi bod yn disgwyl am hwn ers rhai wythnosau ... da iawn a chwarae teg iddyn nhw i gyd."

Cryfhau

Byddai'r clwb yn cryfhau, meddai, gan fod llawer o'r chwaraewyr yn ifanc.

"Pan 'dach chi'n meddwl am oed cyfartaledd y tîm - 19 ydi o.

"Mae yna ddyfodol disglair i lawer iawn o'r chwaraewyr a chyfle wedyn i rai o'r chwaraewyr eraill yn y gogledd i gael chwarae ar lefel uwch," meddai.

"Yn ddiweddar maen nhw wedi bod yn trafeilio i dde Cymru a gogledd Lloegr a llefydd felly i chwarae.

'Addysg'

"Dyma'r ffordd i ni fynd ymlaen a chadw'r hogia' yn y gogledd.

"Ac, wrth gwrs, bydd cyfle iddyn nhw chwarae rygbi a chael addysg yma yng ngholeg Llandrillo felly fydd dim angen iddyn nhw symud allan o ogledd Cymru."

Diolchodd i glybiau eraill gogledd Cymru a Chyngor Conwy "am roi adnoddau mor wych i ni chwarae ynddyn nhw".