Cytundeb newydd i Ryan Giggs gyda Manchester United

Syr Alex Ferguson a Ryan Giggs Image copyright Getty Images
Image caption Chwaraeodd Ryan Giggs i Manchester United am y tro cyntaf ar Fawrth 2 1991

Mae Ryan Giggs wedi arwyddo cytundeb blwyddyn gyda Manchester United.

Mae hyn yn golygu y bydd y Cymro yn chwarae i'r tîm sydd ar frig yr Uwch Gynghrair ar ôl ei ben-blwydd yn 40 oed gan ei gadw yn Old Trafford tan Fehefin 2014.

Mae'n bosib y bydd Giggs yn chwarae am y 1,000fed tro yn ei yrfa dros y penwythnos pan fydd Manchester United yn herio Norwich yn Old Trafford ddydd Sadwrn.

Chwaraeodd cyn-gapten Cymru i United am y tro cyntaf ar Fawrth 2 1991 ac mae wedi sgorio 168 gôl mewn 931 o gemau i'r clwb.

Cynrychiolodd Cymru 64 tro cyn rhoi'r gorau i'w yrfa ryngwladol yn 2007.

Ef oedd capten Tîm Pêl-droed GB yng Ngemau Olympaidd Llundain yr haf diwethaf.

Mae Giggs wedi ennill yr Uwch Gynghrair 12 tro yn ogystal â phedair Cwpan yr FA, tair Cwpan y Gynghrair a Chynghrair Pencampwyr Ewrop ddwywaith gydag United.

Dywedodd rheolwr Manchester United, Syr Alex Ferguson: "Mae Ryan yn esiampl i bawb o ran y ffordd mae'n edrych ar ôl ei hun.

"Rwy' ar ben fy nigon ei fod wedi arwyddo cytundeb newydd."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.