Cyhoeddi cystadleuwyr Canwr y Byd 2013

  • 20 Chwefror 2013
Moldova's Valentina Nafornita was a pop singer before she discovered opera
Valentina Nafornita o Moldova oedd enillydd 2011

Mae'r BBC wedi cyhoeddi'r rhestr o 20 o gantorion fydd yn cystadlu am wobr Canwr y Byd Caerdydd yn 2013.

Bydd y gystadleuaeth yn cael ei chynnal rhwng Mehefin 16-23 yn Neuadd Dewi Sant yng Nghaerdydd.

Mae'r gystadleuaeth yn dathlu ei phen-blwydd yn 30 eleni.

Bu'r beirniaid yn teithio i naw lleoliad ar draws y byd i gynnal clyweliadau gyda'r ymgeiswyr - Berlin, Buenos Aires, Dresden, Llundain, Milan, Moscow, Efrog Newydd, Paris a Vilnius.

Roedd dros 400 wedi ymgeisio drwy anfon perfformiad ar fideo i'r beirniaid, ac fe luniwyd rhestr fer o 52 ar sail hynny cyn y clyweliadau personol.

Fe ddaw'r 20 cystadleuydd terfynol o 17 o wledydd gan fod rheolau'r gystadleuaeth yn caniatáu dau ymgeisydd o Loegr, Yr Eidal a De Korea.

CYSTADLEUWYR CANWR Y BYD CAERDYDD Y BBC 2013
Gwlad Enw Llais Oed
Ariannin Daniela Mack Mezzo-soprano 30
Belarws Yuri Gorodetski Tenor 30
China Yi Li Tenor 28
Croatia Marko Mimica Bas-bariton 25
Lloegr Katherine Broderick Soprano 30
Lloegr Ben Johnson Tenor 29
Yr Aifft Gala El Hadidi Mezzo-soprano 30
Hwngari Mária Celeng Soprano 24
Yr Eidal Loriana Castellano Mezzo-soprano 31
Yr Eidal Teresa Romano Soprano 28
Lithwania Eglé Sidlauskaite Mezzo-soprano 29
Gwlad Pwyl Michal Partyka Bariton 27
Portiwgal Susana Gaspar Soprano 31
Rwsia Alexey Bogdanchikov Bariton 27
De Affrica Luthando Qave Bariton 26
De Korea Jeongcheol Cha Bas-bariton 31
De Korea Kihwan Sim Bas 29
Wcrain Olena Tokar Soprano 25
Unol Daleithiau America Jamie Barton Mezzo-soprano 31
CYMRU Gary Griffiths Bariton 29

Fel ymhob blwyddyn ers i'r gystadleuaeth gael ei chreu yn 1983, fe fydd dwy gerddorfa yn cyfeilio i'r cantorion - Cerddorfa Genedlaethol Cymru y BBC dan arweiniad Jun Markl a Cherddorfa Cwmni Opera Cenedlaethol Cymru o dan arweiniad Graeme Jenkins.

Yn ogystal, fe fydd dau gyfeilydd swyddogol i'r gystadleuaeth - Simon Lepper, sy'n Athro Cyfeilio Piano yn y Coleg Cerdd Brenhinol a hyfforddwr yng Ngholeg Brenhinol Cerdd a Drama Cymru, a Llŷr Williams, perfformiwr enwog sydd wedi perfformio gyda Cherddorfa Symffoni'r BBC, Cerddorfa Genedlaethol Gymreig y BBC, Cerddorfa Ffilharmonig Llundain, Cerddorfa Halle, Sinffonia Cymru a Cherddorfa Minnesota.

Fe fydd enillydd y brif wobr yn derbyn £15,000 a Thlws Caerdydd, ac fe fydd enillydd y wobr Lieder yn derbyn tlws a £5,000.

Y beirniaid ar gyfer y brif wobr fydd Y Fonesig Kiri Te Kanawa, Elena Obraztsova, Neil Shicoff, Bernd Weikl, Maren Hofmeister, Per Boye Hansen a'r cadeirydd Nicholas Payne.