Dyn ar goll: Gwraig yn apelio'n daer

Ben Thompson
Ben Thompson yn croesi Heol Lecwydd, Caerdydd, am 7:17pm nos Sadwrn

Mae gwraig cefnogwr rygbi ddiflannodd wedi gêm rygbi ryngwladol Cymru wedi apelio'n daer am wybodaeth am yr hyn sy' wedi digwydd.

Cafodd Ben Thompson, 34 oed o Hwlffordd, ei weld ddiwethaf am 6.30pm nos Sadwrn yn Lôn y Felin yng nghanol Caerdydd lle oedd wedi bod yn gwylio'r gêm.

Cerddodd i gyfeiriad Treganna ac mae'r lluniau cylch cyfyng yn ei ddangos yn croesi Heol Lecwydd ger Stadiwm Dinas Caerdydd am 7:17pm.

Mewn cynhadledd newyddion yn y brifddinas fe apeliodd ei wraig Jo am help y cyhoedd.

"Plis helpwch fi i ddod o hyd i'r gŵr.

"Hoffwn i ddiolch i'w gydweithwyr a'i ffrindiau oherwydd eu hymdrechion hyd yn hyn ... mae hyn yn dangos bod pawb yn dwlu arno fe.

"Mae'n ddyn caredig a chariadus ac yn ffrind heb ei ail.

"Plis helpwch fi i ddod o hyd iddo fe."

Yn y cyfamser, mae'r heddlu'n holi yn yr ardal o ddrws i ddrws.

Mae Mr Thompson yn 5'9" o daldra gyda gwallt byr brown a llygaid glas.

'Poeni'

Y tro diwethaf iddo gael ei weld roedd yn gwisgo esgidiau brown, jîns ac, o bosib, siwmper gyda streipiau glas a gwyn a siaced werdd.

Dywedodd y Prif Arolygydd Eddie Ough, sy'n arwain yr ymchwiliad: "Mae teulu a ffrindiau Ben yn poeni fwyfwy ac rydym yn cysylltu â nhw'n rheolaidd am yr ymchwiliad.

"Hoffwn ddiolch i aelodau'r cyhoedd sydd wedi ymateb i'n hapêl am wybodaeth.

"Rydym nawr yn awyddus i glywed gan unrhyw un welodd Ben ar ôl 7:17pm nos Sadwrn."

Dylai unrhyw un â gwybodaeth am Mr Thompson gysylltu â'r ystafell reoli yng Ngorsaf Heddlu Bae Caerdydd.