Casnewydd 0-2 Barrow

Clwb Pêl-droed Casnewydd Image copyright Other

Casnewydd 0-2 Barrow

Roedd arwyr lu i Gasnewydd cyn y gic gyntaf yn Rodney Parade ddydd Sadwrn.

Yn dilyn apêl ar wefan Twitter, fe ddaeth tomen o gefnogwyr at ei gilydd i ysgubo'r eira o'r cae er mwyn sicrhau y gallai'r gêm ddigwydd o gwbl ddydd Sadwrn.

Roedd y rheolwr Justin Edinburgh yn awyddus i fanteisio ar y cyfle i agor bwlch ar frig y tabl yn erbyn un o'r clybiau tua'r gwaelod, Barrow, gan fod nifer o gemau eraill y dydd - gan gynnwys gêm Wrecsam yn Lilcoln - wedi cael eu gohirio.

Ond yr ymwelwyr oedd yn dathlu erbyn y diwedd.

Aeth Barrow ar y blaen yn agos at ddiwedd yr hanner cyntaf. Matt Flynn gafodd y dasg hawdd o sgorio o bas Adam Boyes.

Er iddyn nhw gael fwy o feddiant ac o ergydion at y gôl, doedd Casnewydd ddim yn taro deuddeg, ac ar ôl 61 munud, fe ddyblwyd y fantais i'r ymwelwyr.

Y tro hwn roedd hi'n chwip o ergyd gan Danny Rowe i gornel ucha'r rhwyd o ymyl y cwrt cosbi.

Fe fydd colli gartref eto yn sicr yn siom i Justin Edinburgh, a'r unig gysur i Gasnewydd yw bod Forest Green - yr unig dîm arall yn y pump uchaf oedd yn chwarae ddydd Sadwrn - hefyd wedi colli yn Stockport.

TABL UWCHGYNGHRAIR BLUE SQUARE
Gemau Gwahaniaeth Goliau Pwyntiau
1. WRECSAM 27 25 50
2. CASNEWYDD 27 14 49
3. Grimsby 26 24 48
4. Forest Green 27 16 45
5. Kidderminster 28 15 44

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.