Cerbydau newydd i gyrraedd copa'r Wyddfa

  • 5 Tachwedd 2012
Un o'r cerbydau newydd
Image caption Cyrhaeddodd y cyntaf o'r cerbydau newydd fore Llun

Mae Rheilffordd Yr Wyddfa wedi derbyn cerbydau newydd am y tro cyntaf ers i'r rhai gwreiddiol gael eu cyflwyno ar ddechrau'r 1920au.

Fe gyrhaeddodd y cynta' ddydd Llun a bydd tri arall yn dod cyn i'r rheilffordd - sy'n cludo teithwyr i gopa'r Wyddfa - ailagor yn y gwanwyn.

Dywedodd y rheolwr cyffredinol Alan Kendall y byddan nhw'n fwy cysurus ac yn golygu y bydd modd cludo mwy o deithwyr.

Mae'r cerbydau newydd wedi costio £1.2m ac roedd y rheilffordd wedi derbyn cyfraniad gan Lywodraeth Cymru.

"Mae tipyn o waith wedi'i wneud ar y cerbydau presennol o ran trwsio a gwydrau, ac maen nhw'n dyddio'n ôl i thua 1923," meddai Mr Kendall.

"Maent wedi bod yn cael eu defnyddio ers hynny.

Nid oes modd chwarae darnau sain a fideo ar eich dyfais
Aled Hughes oedd wrth droed yr Wyddfa ar ran y Post Cynta' fore Llun.

"Mae'r pedwar cerbyd newydd yn cludo 74 o deithwyr yn hytrach na 56, a bydd hynny'n ateb y gofynion am ran helaeth o'r flwyddyn.

"Bydd teithwyr yn fwy cysurus a bydd golygfa well, a gallan nhw deimlo'n gynhesach neu'n oerach (dibynnu ar y tymheredd)."

'Proses hir'

Dywedodd y byddai'r cerbydau newydd yn cael eu defnyddio gyda threnau diesel, sy'n cludo'r rhan fwyaf o deithwyr i'r copa.

Ond dywedodd y byddai'r hen gerbydau'n parhau i gael eu gyrru gyda'r gwasanaeth stêm.

Daeth y gwasanaeth trên i ben am y flwyddyn ddydd Sul wrth i'r rheilffordd gau dros y gaeaf.

Fe fydd yn ailagor gyda'r cerbydau newydd tua chanol mis Mawrth, gan ddibynnu ar y tywydd.

"Mae'n wych. Mae'n beth mawr i mi'n bersonol achos mae wedi bod yn broses hir," meddai Mr Kendall.

"Rwyf wedi bod gyda'r busnes ers tua 10 mlynedd. Rydych yn dod mewn, gweld beth sydd angen ei wneud, ac o ystyried oedran y cerbydau, roedd hynny'n flaenoriaeth i mi."

Dywedodd y byddai'r cerbydau, ynghyd â'r ganolfan ymwelwyr newydd agorwyd ym mis Mehefin 2009, yn helpu i sicrhau "dyfodol cynaliadwy" i'r busnes.

"Rydym yn adeiladu cerbyd ar gyfer y ganrif hon mewn difri ond yn parchu'r hyn sydd wedi bod o'r blaen. Fe fydd yn cyd-fynd â hyn," meddai.

"Mae'n bwysig gwella ansawdd cyfleusterau ymwelwyr yng Nghymru a dyna be' 'da ni'n ceisio ei wneud."

Image copyright Rheilffordd yr Wyddfa
Image caption Llun cynnar o orsaf Llanberis

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.