Pier Y Mwmbwls wedi ei ddifrodi gan dân

  • 27 Hydref 2012
Pier Y Mwmbwls
Mae gwaith adnewyddu sylweddol yn cael ei wneud i'r pier

Mae criwiau tân wedi bod yn taclo fflamau ar bier y Mwmbwls yn Abertawe wedi tân yno dros nos.

Mae 'na waith adnewyddu'n digwydd ar y pier ar gost o £9.5 miliwn.

Cafodd y gwasanaethau brys eu galw i'r safle toc wedi 1am ddydd Sadwrn.

Mae'r heddlu'n credu y gallai'r tân fod wedi cychwyn o wreichion yn ystod y gwaith adeiladu.

Caiff gorsaf bad achub y Mwmbwls ei adnewyddu.

Dywedodd rheolwr gyfarwyddwr y pier bod y llawer pren wedi ei ddifrodi ond bod y prif strwythur yn iawn.

"Roedd y tân wedi ei gyfyngu i un ardal, y rhan lletaf ar y pen lle mae'r gwaith wedi bod yn mynd rhagddo i godi gorsaf newydd i'r RNLI," meddai John Bollom.

"Y bwriad oedd gweithio o'r pen am yn ôl.

"Gyda hen bren yna gall gwreichion fod wedi bod yn mudlosgi heb i neb sylweddoli tan gewch chi wynt cryf a'r cwbl yn dod yn fyw.

"Byddwn yn ymchwilio i pam fod hyn wedi digwydd er mwyn gwneud yn siwr nad ydi hyn yn digwydd eto.

"Rydym yn ffodus na chafodd neb eu hanafu."