Norofirws: Tair ward wedi cau yn Hwlffordd

Gronynnau Norofirws
Mae rhai achosion o'r salwch stumog Norofirws wedi cael eu cadarnhau.

Mae tair ward wedi eu cau yn Ysbyty Llwynhelyg, Hwlffordd, oherwydd bod rhai o'r cleifion yn dioddef o'r dolur rhydd a chwydu.

Mae rhai achosion o'r salwch stumog Norofirws wedi cael eu cadarnhau ymhlith y rhai sy'n sal.

Mae ward saith, uned ddwys gofal y galon ac uned gofal y galon wedi cau.

Hefyd mae yna gyfyngiadau ar ymwelwyr yng ngweddill yr ysbyty.

Dywed Bwrdd Iechyd Hywel Dda eu bod yn apelio ar y cyhoedd i beidio ag ymweld â'r ysbyty ar hyn o bryd.

Mae'r bwrdd wedi gofyn i berthnasau cleifion ffonio'r wardiau cyn ymweld.

Mae Norofirws, sy'n lledu oherwydd cysylltiad â pherson neu wrthrych wedi ei heintio, yn effeithio ar hyd at filiwn o bobl y flwyddyn ym Mhrydain.

Golchi'r dwylo yw'r ffordd orau i atal lledu'r firws sydd, fel arfer, yn dod i ben o fewn 48 awr.