Cyhuddo dyn o lofruddio Catherine Gowing

Catherine Gowing
Mae'r heddlu yn poeni bod Catherine Gowing wedi cael 'niwed sylweddol'

Mae dyn 46 oed wedi'i gyhuddo o lofruddio Catherine Gowing.

Bydd Clive Sharpe o Fethesda yn ymddangos gerbron Llys Ynadon yr Wyddgrug ddydd Sadwrn am 10:00am.

Yn gynharach ddydd Gwener cadarnhaodd Heddlu'r Gogledd sy'n chwilio am Ms Gowing, milfeddyg 37 oed, eu bod wedi dod o hyd i'w char ger hen chwarel yn ardal Alltami.

Cafodd Ms Gowing, sy'n hanu o Iwerddon yn wreiddiol ei gweld am y tro diwethaf mewn archfarchnad yn Sir y Fflint are nos Wener 12 Hydref.

Dywedodd y ditectif uwch-arolygydd John Hanson ei fod yn parhau i apelio ar unrhyw un oedd yn ardal Pinfold Lane y penwythnos diwethaf i gysylltu â'r heddlu ar 101 gydag unrhyw wybodaeth.

Mae teulu Ms Gowing yng ngogledd Cymru ac mae swyddogion arbenigol yr heddlu yn eu cefnogi a'u cwnsela.