Coleman: Amddiffyn yn 'gywilyddus'

  • 12 Medi 2012
Chris Coleman watches Wales lose 6-1 in Novi Sad Image copyright Reuters

Dywedodd rheolwr pêl-droed Cymru, Chris Coleman, ei fod yn teimlo cywilydd oherwydd perfformiad ei dîm gollodd o 6-1 yn erbyn Serbia nos Fawrth.

Y golled yn Novi Sad oedd y waethaf i Gymru ers colli 7-1 yn erbyn Yr Iseldiroedd yn 1996.

"Roedden ni'n gwybod y byddai'n gêm anodd ond wnaethon ni ddim sylweddoli faint fyddai'r sgôr," meddai Coleman.

"Dyw dweud ein bod yn siomedig ddim yn hanner y stori ac mae'n rhaid i ni wneud yn well oherwydd roedd rhai o'r goliau'n gywilyddus.

Ar y gwaelod

"Mae gennym fynydd i'w ddringo gan ein bod wedi bod ar ei hôl hi ar yr egwyl ymhob gêm ers i mi gymryd y llyw."

Roedd y golled yn gadael Cymru ar waelod Grŵp A yn y gemau rhagbrofol ar ôl colli o 2-0 yn erbyn Gwlad Belg yng Nghaerdydd nos Wener.

Roedd Coleman wedi dweud bod agweddau positif yn erbyn Gwlad Belg er i James Collins gael cerdyn coch yng nghanol yr hanner cyntaf.

Ond doedd dim byd positif, meddai, yn y gêm yn erbyn Serbia.

"Mae'r perfformiad yn embaras i mi - rhaid i mi ddefnyddio'r gair," meddai Coleman.

'Dim hawl'

"Pan ydych yn chwarae dros eich gwlad, rhaid cael rhywfaint o awch a herio'r gwrthwynebwyr. Mae gennym chwaraewyr sy'n medru chwarae pêl-droed ond rhaid ennill yr hawl i wneud hynny.

"Doedden ni ddim wedi ennill yr hawl yna yn erbyn Serbia. Cyn yr egwyl a hithau'n 2-1, roedden ni yn ôl yn y gêm ond wedyn roedd rhoi anrheg o gôl arall cyn hanner amser yn siomedig iawn iawn.

"Fe ddywedon ni ar yr egwyl y byddai'r gôl nesa yn newid y sefyllfa ac fe wnaeth. Fe aeth pethau o ddrwg i waeth yn anffodus.

"Rwy'n derbyn cyfrifoldeb. Fi yw'r rheolwr. Ond wnawn ni ddim derbyn perfformiad fel yna. Mae colli 6-1 yn gweir a does dim modd anwybyddu hynny."

Yn y ddwy gêm ragbrofol nesaf, bydd Cymru'n croesawu'r Alban i Stadiwm Dinas Caerdydd ar Hydref 12, gydag ymweliad â Croatia bedwar diwrnod yn ddiweddarach.

Cafodd Yr Alban gêm gyfartal arall yn erbyn Macedonia nos Fawrth yn dilyn eu pwynt yn erbyn Serbia ddydd Sadwrn, a chyfartal oedd hi hefyd rhwng Croatia a Gwlad Belg nos Fawrth.

GEMAU RHAGBROFOL CWPAN Y BYD 2014 - GRŴP A
Ch. E Cyf. Colli Pwyntiau
1. Serbia 2 1 1 0 4
2. Gwlad Belg 2 1 1 0 4
3. Croatia 2 1 1 0 4
4. Yr Alban 2 0 2 0 2
5. Macedonia 2 0 1 1 1
6. CYMRU 2 0 0 2 0

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.