Y Gymraeg yn ennill tir wrth ymddangos ar arwyddion ffordd yn Lloegr

Arwydd ffordd ddwyieithog yn Sir Hampshire
Ymddangosodd yr arwydd dros dro yma yn Sir Hampshire

Roedd yna olygfa anarferol yn wynebu gyrwyr yn Hampshire yn ne Lloegr.

Ond o leiaf roedd un o drigolion pentref bychan Purbrook yn gwybod yn union pa iaith oedd yn ei rhybuddio wrth yrru.

Dywedodd Adele Mallows, sy'n wreiddiol o Abertawe, ei bod yn gwybod yn syth mai cyfarwyddiadau Cymraeg oedd yn ei rhybuddio am y diffyg marciau ffordd.

Dywed y cyngor sir fod y contractwyr a ddefnyddiwyd yn gweithio ar hyd a lled Prydain.

Dywedodd Mrs Mallows ei fod wedi cael syndod o weld yr arwydd.

"Dwn i ddim beth oedd pobl eraill yn ei feddwl.

"Ond rwy'n sicr eu bod yn gwybod ei fod yn arwydd Cymraeg.

"Yr hyn sy'n ddoniol yw bod yr arwydd yn dweud nad oes yna farciau ffordd - ond dyw hynny ddim yn wir, felly mae'r arwydd yn nonsens beth bynnag. "

Dywedodd y cynghorydd Mel Kendal ei fod yn bosib nad oedd arwyddion uniaith Saesneg ar gael pan ddechreuodd y gwaith.

"Wrth gwrs does gan Hampshire ddim angen arwyddion yn y ddwy iaith a byddai hyn ddim yn dderbyniol ar arwydd parhaol.

"Ond doedd yr arwyddion dan sylw ddim yn rhai parhaol ac roedd y neges bwysig yn gwbl glir ac yn ddealladwy."