Galw am rhyddhau Bradley Manning

  • 19 Awst 2012
Julian Assange
Roedd Julian Assange yn siarad o falconi llysgenhadaeth Ecuador yn Llundain

Mae sefydlydd gwefan Wikileaks, Julian Assange, wedi gwneud ei ddatganiad cyhoeddus cyntaf ers iddo ffoi i lysgenhadaeth Ecuador ddeufis yn ôl.

Yn y datganiad, galwodd ar America i ryddhau'r milwr Bradley Manning, a fagwyd yn Sir Benfro, ac i roi'r gorau i erlid ei wefan.

Mae Mr Assange wedi bod yn cuddio yn y llysgenhadaeth er mwyn ceisio osgoi cael ei estraddodi i Sweden, lle mae'n wynebu cyhuddiadau o droseddau rhyw.

Os fydd yn mynd i Sweden, mae cefnogwyr Assange yn credu y bydd America yn manteisio ar y cyfle i'w estraddodi yno i wynebu cyhuddiadau'n ymwneud a chyfrinachau milwrol.

Mae Bradley Manning wedi cael ei ddal am ddwy flynedd a chwarter wrth aros i sefyll ei brawf ar gyhuddiadau ei fod wedi datgelu cyfrinachau i wefan Wikileaks allai fod wedi peryglu staff milwrol America yn y Gwlff.

Bradley Manning

'Arwr'

Wrth siarad o falconi llysgenhadaeth Ecuador yn Knightsbridge, dywedodd Mr Assange: "Ddydd Mercher, treuliodd Bradley Manning ei 815fed diwrnod dan glo heb achos llys.

"Yr uchafswm cyfreithiol yw 120 o ddyddiau. Mae yna undod yn y gorthrwm hwn."

Disgrifiodd Bradley Manning fel arwr ac "yn esiampl i ni gyd", gan arwain at gymeradwyaeth gan y dorf o ugeiniau o gefnogwyr y tu allan.

Yr wythnos diwethaf, fe wnaeth Ecuador ganiatáu lloches wleidyddol i Mr Assange, ond mae llywodraeth y DU wedi pwysleisio na fydd yn cael gadael y DU, ac y bydd yn cael ei arestio pan fydd yn gadael y llysgenhadaeth.

Yn ei ddatganiad ddydd Sul, cyhuddodd Mr Assange yr heddlu o geisio cynnal cyrch ar y llysgenhadaeth er mwyn ei dynnu allan, ond bod y torfeydd y tu allan wedi eu rhwystro.

Mae Mr Assange wedi gofyn i Sweden am sicrwydd na fydd yn cael ei estraddodi oddi yno i America, a phan ddaw'r sicrwydd hwnnw ei fod yn barod i fynd i Sweden.