Cynghorwyr yn gwrthod cais i godi llosgydd

  • 25 Gorffennaf 2012
Llosgydd arfaethedig Llanwern
Roedd y llosgydd yn rhan o brosiect pum awdurdod lleol i geisio delio â gwastraff nad oedd modd ei ailgylchu

Mae Cyngor Casnewydd wedi gwrthod cynlluniau i godi llosgydd enfawr ar hen dir gwaith dur Llanwern.

Yng nghyfarfod arbennig y pwyllgor cynllunio pleidleisiodd cynghorwyr 8-1 yn erbyn y cynnig.

Roedd cwmni Veolia Environmental Services am godi'r llosgydd fyddai wedi trin 250,000 tunnell o wastraff y flwyddyn.

Roedd adroddiad blaenorol yn argymell cymeradwyo'r cynlluniau.

Mae'r cyngor wedi dweud nad ydyn nhw am wneud unrhyw sylw pellach.

Bygythiad

Roedd Ymddiriedolaeth Bywyd Gwyllt Gwent wedi honni bod y bygythiad i fywyd gwyllt yn aber Afon Hafren a Gwastadeddau Gwent yn rhy uchel.

Eisoes dywedodd y cwmni sy'n gyfrifol am y cynllun eu bod wedi "cynnal asesiad amgylcheddol cynhwysfawr".

Roedd y prosiect yn rhan o gynlluniau pump o gynghorau De Cymru i ddelio â gwastraff nad oedd modd ei ailgylchu.