Caerdydd yn cael ail gyfle

Don Cowie Image copyright Other
Image caption Don Cowie sgoriodd ail gôl Caerdydd

Mae Caerdydd wedi cymhwyso ar gyfer gemau ail gyfle'r Bencampwriaeth wedi iddynt guro Crytal Palace 2-1 oddi cartref ym Mharc Selhurst ddydd Sadwrn.

Bydd yr Adar Gleision yn herio West Ham yn y rownd gynderfynol.

Bydd y cymal cyntaf yn cael ei gynnal yn Stadiwm Caerdydd am 7.45pm Ddydd Iau Mai 3 a bydd yr ail gymal yn cael ei gynnal ym Mharc Upton am 4.30pm ddydd Llun Mai 7.

Teithiodd Caerdydd i Lundain gan wybod y byddai pwynt mwy na thebyg yn ddigon i orffen yn y chwech uchaf.

Cic rydd

Roedd hi'n brynhawn nerfus i gefnogwyr Caerdydd wedi iddyn nhw weld eu tîm yn diodde' torcalon sawl tro yn y gemau ail gyfle dros y tymhorau diweddar.

Cafodd yr Adar Gleision ddechrau gwael wrth i Wilfried Zaha roi'r tîm cartref ar y blaen wedi 13 munud.

Unionodd Peter Whittingham y sgôr gyda chic rydd ar ôl 53 munud.

Aeth Caerdydd ar y blaen naw munud yn ddiweddarach pan rwydodd Don Cowie wedi i Mark Hudson benio tafliad hir Aaron Gunnarsson i gyfeiriad Cowie yn y cwrt cosbi.

Tarodd hwnnw foli heibio gôl geidwad Crystal Palace i sicrhau y byddai'r Adar Gleision yn cyrraedd y gemau ail gyfle am y drydedd flwyddyn yn olynol.

Collodd yr Adar Gleision i Reading yn y rownd gynderfynol y llynedd, ac fe gollon nhw yn y rownd derfynol yn Wembley i Blackpool yn 2010.

Crystal Palace: Price, McCarthy, Moxey, Parsons, Parr, Ambrose, Garvan, O'Keefe,Scannell (Pedroza - 54' ), Zaha, Murray.

Eilyddion: Fitzsimons , Wynter, De Silva, Sekajja,

Caerdydd: Marshall, McNaughton, Taylor, Hudson, Turner, Whittingham, Cowie, Lawrence, Gunnarsson, Miller, Mason,

Eilyddion: Heaton, Blake, Mchail, Earnshaw, Gestede,

TABL Y BENCAMPWRIAETH
Gemau Gwahaniaeth Goliau Pwyntiau
1. Reading 46 +28 89
2. Southampton 46 +39 88
3. West Ham 46 +33 86
4. Birmingham 46 +27 76
5. Blackpool 46 +20 75
6. CAERDYDD 46 +13 75
-----------------------------------------------------------------------------------------
7. Middlesbrough 46 +1 70

Ebrill 28, 2012