Adfer adeilad mwyngloddio

  • 23 Mawrth 2012
Mwynglawdd Talargoch
Fe roddwyd y gorau i'r mwyngloddio yn 1884

Mae cyfle i'r cyhoedd gael golwg ar waith atgyweirio adeilad oedd ar un adeg gartref i beiriant i hen waith plwm yn Sir Ddinbych.

Fe adeiladwyd Clive Engine House, cwt injan Cernywaidd yn Nyserth, yn 1860.

Ynddo roedd silindr stêm a oedd yn gweithio pympiau dŵr ym Mwynglawdd Talargoch.

Fe roddwyd y gorau i weithio yno yn 1884.

Mae'n un o'r ychydig adfeilion sydd ar ôl o ddiwydaint oedd ar un adeg yn bwysig iawn yn yr ardal.

'Diogelu'r adeilad'

Dywedodd Fiona Gale, Archeolegydd Sir Ddinbych: "Roedd yna gyfle ffantastig i drwsio'r adeilad a'i adfer."

Bydd Ms Gale yn rhoi sgyrsiau am hanes yr adeilad fel rhan o'r diwrnod agored.

"Mae'r safle ar dir preifat, felly mae'n gyfle i bobl ymweld â'r adeilad am y tro cyntaf," meddai Ms Gale.

Dywedodd y Cynghorydd David Thomas, Aelod Arweiniol y Cabinet dros Adfywio:

"Dewch draw i weld beth sy'n digwydd i warchod ac i ddiogelu'r adeilad yma.

"Mae'n rhan bwysig o'n treftadaeth ac yn brawf o'r diwrnod caled o waith y rhai oedd yn gweithio yn y mwyngloddiau."