Katherine Jenkins i gystadlu ar Dancing With The Stars

  • 28 Chwefror 2012
Katherine Jenkins Image copyright AP
Image caption Mae Katherine Jenkins yn edrych ymlaen i gymryd rhan yn y gyfres

Fe fydd y gantores o Gastell-nedd Katherine Jenkins yn cymryd rhan yn y gyfres deledu Dancing with the Stars yn Amercia.

Dyma fersiwn America o Strictly Come Dancing y BBC.

Ymhlith y rhai eraill fydd yn cymryd rhan eleni y bydd cyn-bencamwraig Wimbledon Martina Navratilova a'r gantores Gladys Knight.

Dim dyma'r tro cyntaf i Jenkins ymddangos ar y gyfres, mae hi wedi perfformio o'r blaen.

Un o'r beirniaid yw prif feirniad Strictly, Len Goodman.

Ymhlith y Prydeinwyr i gystadlu yn y gorffennol y mae Heather Mills a Kelly Osbourne.

"Mae Katherine yn edrych ymlaen at gymryd rhan," meddai llefarydd ar ran y gantores 31 oed.

Ei gobaith yw y bydd y gyfres yn llwyfan i'w gyrfa glasurol yn America.

Fe fydd y cystadleuwyr yn dawnsio am y tro cyntaf ar Fawrth 19 a 26.

Ymhlith enillwyr blaenorol y mae actores Dirty Dancing Jennifer Grey a fu'n feirniad gwadd ar Strictly Come Dancing y llynedd a chyn-gantores Pussycat Dolls Nicole Scherzinger.

Fe wnaeth Jenkins gyhoeddi ei bod hi a'r cyflwynydd Gethin Jones wedi gwahanu ym mis Rhagfyr.

Fe wnaeth y ddau gyfarfod pan oedd Jones yn cystadlu ar Strictly Come Dancing yn 2007.

Daeth Jones yn drydydd gyda'i bartner Camilla Dallerup.

Bydd Jenkins yn dawnsio gyda Mark Ballas.