Colli'r darlledwr a'r cynhyrchydd teledu Emyr Daniel

Emyr Daniel yn 1978 Image copyright bbc
Image caption Roedd Emyr Daniel yn un o uwch swyddogion HTV Cymru yn yr 1980au

Bu farw'r darlledwr a'r cynhyrchydd teledu Emyr Daniel.

Roedd yn 63 oed.

Bu'n newyddiadurwr gyda BBC Cymru gan weithio ar raglen Heddiw a Radio Cymru rhwng 1974 a 1981.

Bu hefyd yn un o uwch swyddogion HTV yn yr 1980au gan gynhyrchu nifer o raglenni ar gyfer S4C.

Roedd yn gyn-gadeirydd Bafta Cymru.

Cafodd ei eni ym Maenclochog ac fe dderbyniodd ei addysg yn Ysgol Ramadeg Caerfyrddin a Choleg Yr Iesu, Rhydychen.

Dywedodd Rhodri Talfan Davies, Cyfarwyddwr, BBC Cymru Wales:

"Roedd doniau darlledu Emyr yn doreithiog.

"Daeth â thrylwyredd, hiwmor a chynhesrwydd i bawb a weithiai gyda nhw - o'i ddyddiau cynnar fel gohebydd a chyflwynydd yn BBC Cymru i'w yrfa amlwg yn HTV."

Dywedodd Phil Henfrey, pennaeth newyddion a rhaglenni ITV Cymru: "Roedd Emyr Daniel yn un o ffigyrau amlycaf darlledu Cymru dros gyfnod o bedwar degawd.

"Roedd yn ffigwr amlwg yn llwyddiant HTV Cymru, a chafodd ei benodi yn rheolwr gyfarwyddwr y cwmni.

"Gwleidyddiaeth a materion cyfoes oedd ei ddiddordeb mawr ac roedd yn gyflwynydd ac yn gynhyrchydd blaengar."