 |
 |
|
Cofio George Noakes
gan Patrick Thomas |
|
|
|
Bore Mawrth, Gorffennaf 22, 2008
Cyfaill cywir a bugail da
Yn nes ymlaen heddiw mi fydda' i'n mynd i angladd George Noakes, cyn-Archesgob Cymru.
Fe es i ato i fwrw fy mhrentisiaeth fel curad yn Aberystwyth, bron ddeng mlynedd ar hugain yn ôl, ac roedd George yn athro penigamp.
Roedd y dyn annwyl gostyngedig yma yn fugail ac yn bregethwr cofiadwy gydag arddull blaen, ddirodres, a oedd yn adlewyrchiad o'i gymeriad hoffus.
A phan aeth e'n esgob ac wedyn yn archesgob ni chollodd y rhinweddau hyn.
Roedd e'n dal yn fugail gofalus i'w offeiriaid ac yn gyfathrebwr gwych, gyda'r ddawn arbennig i gyfleu gwirioneddau mawr mewn geiriau syml.
Cymraeg sigledig
Er mai Cymraeg Wlpan, sigledig, oedd gen i pan gychwynnais yn gurad ei eiriau cyntaf i mi oedd; "Ti sy'n gyfrifol am yr eglwys Gymraeg."
Ac fe aeth â fi at yr eglwys honno gan roi gorchymyn pendant i'r aelodau i beidio â siarad gair o Saesneg â fi.
Ac os oedd amynedd eglwyswyr hynaws Eglwys y Santes Fair gyda'u curad lled anghyfiaith yn rhyfeddol, roedd amynedd George yn fwy syfrdanol fyth.
Bob bore Llun fe elwn ato i gael fy ngorchmynion am yr wythnos. Yn aml iawn fe wnes i gamddeall ei eiriau yn llwyr - gan wneud pob math o bethau twp o ganlyniad.
Ond cefais faddeuant bob tro.
Trwy'r bregeth
Ac ar nos Wener fe elai George dros fy mhregeth Gymraeg er mwyn cymhennu a chywiro a gwneud synnwyr o'm nonsens i - ac mi fyddai'r inc coch yn tasgu dros y tudalennau.
Mi fydd llawer o bobl yn diolch i Dduw am George Noakes heddiw, gan gofio am lawer o gymwynasau o'i eiddo ef.
Ond yn bersonol rwy'n diolch am anrheg amhrisiadwy y Gymraeg a roddwyd i mi trwy ei garedigrwydd amyneddgar ef.
Roedd George Noakes yn rhywbeth llawer pwysicach nag esgob neu archesgob - bu'n gyfaill cywir ac yn fugail da.
Marw George Noakes
I ddarllen sgyrsiau eraill: Cliciwch
|
|
|
|
|
|
|
