Tri allan o ddeg
Wrth roi dim ond tri marc iddo dywedodd Ben Thomas, y pregethwr stryd, i Rowan Williams, yn ei olwg ef, fod yn barotach i ddweud ei farn ar faterion cyfoes nag i ddatgan "gwirioneddau tragwyddol yr efengyl".

Meddai: "Anodd cofio amdano yn dweud mai'r unig ateb i broblemau ein hoes yw i ni droi at yr Arglwydd Iesu Grist."

Ychwanegodd: "Mae gen i ofn fod Rowan wedi colli'r cyfle i ddangos mai'r Beibl yw ei awdurdod ac i arwain yng ngoleuni gair Duw." Ac er gwaethaf deall mawr a ddiwinyddiaeth ddofn Rowan Williams cred ben Thomas iddo "golli gafael ar wirioneddau sylfaenol, syml, y ffydd."

Chwech allan o ddeg
Dyfarniad y newyddiadurwr a'r awdur, Hywel Williams, oedd chwech allan o ddeg gan ddweud mai problem bennaf yr Archesgob yw methu â chyfathrebu â phobl.

"Mae'n rhy hawdd dweud ein bod yn byw mewn byd sy'n arwynebol oherwydd y pwyslais ar gyfathrebu cryno a chofiadwy," eglurodd.

"Yr ydym i gyd, waeth pa mor glyfar, yn medru elwa ar wrando ar gyngor profiadol sy'n gallu golygu ein geiriau ac rwy'n ofni yn hyn o beth fod Dr Williams yn or ddibynnol ar ei ysbrydoliaeth ei hun," meddai.

Ychwanegodd fod yr ymateb i'w sylwadau diweddar ar Gyfraith Sharia yn "rhagweladwy" yn y cyd-destun hwn.

Dywedodd y dylai "meddwl dadansoddiadol o'r radd gyntaf" fod yn feistr ar nifer o gyfryngau o'r llyfr estynedig i'r ysgrif fer ond ofnai mai dim ond un arddull sydd gan Rowan Williams.

Tra bo'r Dr Williams yn "un sy'n defnyddio gormod o eiriau ac sy'n ymhyfrydu yn ei haniaethau" dywedodd mai'r gwir arwydd o ddeallusrwydd yw gallu person i gyflwyno pwnc astrus mewn ffordd sydd yn . eglur a dealladwy.

Yng ngoleuni hyn disgrifiodd flwyddyn gyntaf yr Archesgob fel un "gymysglyd".

"Ond o leiaf mae wedi sicrhau fod Eglwys Loegr yn gyson ar y ddalen flaen er nad am resymau yr oedd ef yn eu rhagweld!," meddai.