Rachel Milner o Trobwynt yn siarad gyda John Roberts ar Bwrw Golwg, Chwefror 4, 2007

Geraint Rees o Ysgol Plasmawr, caerdydd, yn siarad gyda John Roberts ar Bwrw Golwg, Chwefror 4, 2007

A hithau'n Sul Addysg bu prifathro a merch ifanc sy'n ymweld ag ysgolion i drafod ei phrofiadau crefyddol yn siarad gyda John Roberts am y diwrnod a'i thema, Y Trawsnewid Eithaf, ar Bwrw Golwg, ddydd Sul, Chwefror 4 2007.

Mae Geraint Rees yn brifathro Ysgol Plasmawr Caerdydd a Rachel Milner yn gweithio gyda'r elusen Trobwynt ym Mhen Llŷn ac Eifionydd yn ymweld ag ysgolion yn cyflwyno'r efengyl.

O dywyllwch i oleuni
Disgrifiodd Rachel 'Y Trawsnewid Eithaf'' fel newid ym mywyd pobl sy'n peri iddyn nhw fyw mewn ffordd hollol wahanol wedi hynny a dywedodd iddi hi gael y profiad hwnnw.

"Yn y Beibl mae'n sôn am newid o fyw yn y tywyllwch i fyw yn y goleuni a mynd o farwolaeth i fywyd," meddai.

"Pan oeddwn i'n fach, pan wnes i ddechrau mynd i'r capel a'r eglwys yn wyth neu naw oed, mi wnes i'r penderfyniad fy mod i eisiau adnabod Iesu Grist yn well. Fel ffrind personol i mi.

"Pan oeddwn i yn fy teenage years fe wnes i drio ffitio'i mewn efo plant a thrio ffitio'i mewn efo pob dim arall oedd yn mynd ymlaen yn yr ysgol ac fe ddaeth i'r pwynt pan ddechreuais i feddwl pam yr ydyw i'n gwneud hyn a pham ydw i eisiau bod fel nhw - achos yn y Beibl mae'n dweud ein bod ni'n wahanol ac mae Iesu Grist wedi'n dewis ni i fod yn bobl bwysig.

"Felly, mi wnes i wneud y penderfyniad yna i ofyn i Iesu Grist ddod i mywyd i ac mi wnes i weld newid eithaf mawr yn fy mywyd a'r ffordd oeddwn i'n ymddwyn ac yn ymateb yn wahanol i bethau.

Byw i Dduw
"Mi wnaeth y ffocws fynd o fyw i mi fy hun i fyw i Dduw - mi wnaeth ddod yn rhywbeth personol ac yn rhywbeth real iawn - clywed straeon am Iesu Grist a chlywed beth wnaeth ddigwydd a sylweddoli ei fod yn rhywbeth a wnaeth ddigwydd a bod y straeon yn fwy na straeon a bod y pethau yna wedi digwydd a bod Iesu Grist wedi gwneud y pethau yna er fy mwyn i," meddai.

"Does yna neb arall wedi gwneud hynny drosof, does yna neb arall wedi marw drosof a dyna pam gwnes i'r penderfyniad yna i ddilyn Iesu Grist," eglurodd.

Wrth ei gwaith gyda'r mudiad Trobwynt dywedodd ei bod yn ymweld ag ysgolion cynradd ac uwchradd yn trafod o safbwynt Gristnogol faterion cymunedol, addysg bersonol a chymdeithasol.

Mae hefyd yn gwneud gwaith yn y gymuned gyda grwpiau ieuenctid.

"A thrio cael y capeli a'r eglwysi i ddod at ei gilydd i gydweithio hefyd," meddai. Rhannu profiadau
Croesawodd y cyfle i Gristnogion eraill 18 a 19 oed, rannu eu profiadau gyda phlant.

"Mae'n stori bersonol sut y cawsant y trawsnewidiad a sut mae wedi effeithio arnyn nhw," meddai.

"Maen nhw'n fwy tebyg o wrando ar rywun sy'n sôn sut y gwnaethant hwy newid a pham mae'r pethau yma wedi digwydd yn eu bywyd nhw," ychwanegodd.

"Rydw i'n gweld lot o hadau yn cael eu plannu ym mywydau plant a phobl ifainc ac maen nhw'n gofyn llawer o gwestiynau ac rydw i'n gallu gweld y trawsnewidiad yna yn dechrau," meddai.

Am y gwaith hwn dywedodd:
"Dydw i ddim yn trio brainwashio - ond yn rhoi cyfle iddyn nhw gael clywed am Iesu Grist - maen nhw yn cael clywed am grefyddau a ffyrdd eraill o fyw eu bywyd ac rydym ni yn rhoi opsiwn arall iddyn nhw a dangos sut mae hynny wedi effeithio ar fy mywyd i," meddai

Yr hawl i wneud
Wrth ymateb i sylw ynglŷn â hawl Cristnogion i ddweud fod bywyd pobl yn arwynebol o gymharu â bywyd y Cristion dywedodd:

"O fy mhrofiad i gyda phobl ifainc maen nhw'n cael eu dylanwadu gan bapurau newydd ac maen nhw eisiau byw bywyd fel y selebritis.

"Dydw i ddim yn dweud fod hynny yn beth rong ond rydw i wedi gweld o fy mhrofiad i, pan fod y bobl ifanc yma yn cael y ffigyrs perffaith, yn cael y gwallt neu yn cael y cariad dydi o ddim yn llenwi'u bywyd nhw fel roedden nhw'n meddwl . . ."

"Os ydych chi'n hapus fel'na mae o'n iawn ond o fy mhrofiad i dydw i ddim yn meddwl fod y bobl ifainc sy'n cael y pethau yna yn hapus go iawn ac maen nhw eisiau rhywbeth arall," meddai.