 |
 |
|
Gweithio ymhlith yr ifanc
Nigel Davies yn sôn am yr her o ddenu'r ifanc at Grist |
|
|
|
Isod, gellir clicio i wrando ar Nigel Davies yn siarad
Bu gweithiwr ieuenctid yn sôn am yr her o geisio ennill pobl ifainc i'r ffydd Gristnogol mewn sgwrs ar Bwrw Golwg Rhafyr 17, 2006.
Dywedodd Nigel Davies mai'r her fawr sy'n ei wynebu yw dod o hyd i ffyrdd o ennill ymddiriedaeth plant a phobl ifainc.
Mae Mr Davies, a fu'n gweithio i'r Cyngor Ysgolion Sul, yn weithiwr plant a ieuenctid gydag eglwysi o wahanol enwadau yng ngogledd Sir Gaerfyrddin ifainc lle mae oddeutu 40 o eglwysi wedi ymuno â chynllun ymhlith plant a'r ifanc.
'Rhaid ennill yr hawl'
Nid yw'n waith hawdd.
"Mae'n rhaid ennill yr hawl i gael ymddiriedaeth plant a phobl ifanc - dydw i ddim yn credu fod gennym ni yr hawl i fynd yn syth atyn nhw a disgwyl iddyn nhw ymateb i neges yr efengyl.
"Ennill yr hawl i rannu Crist gyda nhw yw cyfrinach gweithio gyda phlant a phobl ifainc a bod yn barod hefyd i fynd i mewn i'w byd nhw a gweld pethau fwy fel maen nhw'n gweld pethau."
Yr ifanc wedi eu hynysu
Dywedodd mai un o'r pethau "cyffrous" y mae'n gobeithio ei ddechrau fis Ionawr yw oedfa unwaith y mis yn arbennig ar gyfer yr ifainc.
"Mae wedi ei hanelu yn gyfangwbl ar gyfer rhai sydd o oed ysgol uwchradd gan fy mod yn teimlo fod yr oedran hwnnw yn un ynysig iawn yn ein capeli a'n heglwysi ni.
"Mae gennych chi ddau fan hyn a thri fan acw ac un fan arall. Ceisio eu cael nhw at ei gilydd [fel] eu bod nhw'n mwynhau cwmni'i gilydd a threfnu a chynnal oedfa tipyn yn wahanol i'r oedfa draddodiadol fydden nhw'n i chael yn y capel neu eglwys [fyddaf i]."
Gall hynny olygu defnyddio offer technegol newydd fel sgrin fawr i ddangos DVD "cwbl seciwlar" a defnyddio hynny i arwain ymlaen at gwestiynau ysbrydol.
"Codi pwyntiau o'r DVD, ennill eu sylw nhw ac wedyn codi o hynny bethau cwbl Feiblaidd.. Rwy'n gweld ei fod e'n rhywbeth y maen nhw'n i fwynhau ac yn cael eu herio yr un pryd."
Lefel hollol wahanol
Er yn amharod i feirniadu dywedodd nad yw'r eglwysi fel ag y maent yn dda pan yw hi'n dod i ddarparu ar gyfer yr ifanc.
"Fe gawn ni nhw i gymryd rhan yn yr oedfa a rhoi rhyw emyn neu ddarlleniad allan gan ddweud mai dyna yw oedfa ieuenctid ond y maen nhw yn meddwl ac yn bodoli ar lefel hollol, hollol, wahanol i oedolion ac rwy'n credu fod hwn efallai yn gyfle i'w cael nhw ynghyd ac arbrofi mewn ffordd wahanol i'r hyn sy'n bosib yn yr eglwys leol."
Ychwanegodd y bydd yn cynnal yr 'oedfaon' mewn lle mor gysurus a phosibl yn hytrach nag mewn capel.
"Dydw i ddim yn moyn siarad ar draws nifer o seddi gwag - ond eu bod yn gallu bod yn grŵp hapus gyda'i gilydd," meddai.
 Nigel Davies yn trafod gyda John Roberts ar Bwrw Golwg, Rhagfyr 17, 2006
Y Nadolig - nid i'r ifanc yn unig
Bu Nigel Davies yn trafod arwyddocâd y Nadolig hefyd yn ystod ei sgwrs ond rhybuddiodd nad gŵyl ar gyfer yr ifanc yn unig yw hon.
"Mae'n adeg arbennig i blant a ieuenctid, y Nadolig. Maen nhw'n edrych ymlaen, maen nhw'n gyffrous ond fel Cristion fe fyddwn yn dweud hefyd ei bod yn Ŵyl arbennig i bawb.
"Pan ydych chi'n gwir edrych ar y Nadolig mae Duw yn dod yn ddyn ac yn gwisgo cnawd ac yn bodoli yn ein plith ni ac wrth gwrs y mae plentyn o gael gwefr y Nadolig gobeithio yn tyfu i fyny a'i feithrin i weld mwy a mwy o ryfeddod yn yr Ŵyl a dyw dyn ddim yn peidio â synnu a dweud y gwir beth yw gwir ystyr yr ŵyl," meddai.
|
|
|
|
|
|
