Croesawodd Catherine James gyhoeddi'r llyfr mewn maes lle mae prinder mawr o lyfrau wedi eu cyhoeddi. Gadael Cymru

Bu hefyd yn sôn am berthynas y Crynwyr â Chymru. "Yn y dechrau roedd o [sef cyfraniad y Crynwyr] yn eithriadol o bwysig oherwydd y symud o Gymru i Bennsylvania.

"Roedd y Crynwyr yn cael eu herlid mor ffyrnig ac yr oedd yna addewid yn Pennsylvania y buasen nhw yn cael tir a lle i addoli yn eu hiaith eu hunain ac yn eu dull eu hunain ac yn eu ffordd eu hunain ac y buasen nhw'n cael llonydd yn Pennsylvania.

"Felly mi aethon nhw allan ac mi gollodd Cymru, a dweud y gwir, nifer o arweinwyr pwysig yn y cyfnod cynnar.

"Ond hefyd roedd neges George Fox yn bwysig - ac mae'n dal; yn bwysig heddiw, y ffaith fod pob un ohonom ni yn blentyn i Dduw ac yn gyfartal yng ngolwg Duw a bod rhywfaint o Dduw ym mhob un ohonom ni - y golau mewnol," meddai.

Duw ym mhawb
Apêl y Cyfeillion cynharaf oedd y syniad o ddychwelyd at Gristnogaeth sylfaenol a pherthynas uniongyrchol â Duw heb orddibynnu ar yr Ysgrythur - sef chwilio am "y golau mewnol".

Pan ofynnodd John Roberts, cyflwynydd Bwrw Golwg a yw'r apêl honno yn parhau yr un mor gryf dywedodd Catherine James:

. "Dydw i ddim yn meddwl fod y neges wedi mynd adref i bobl yn ddigon da ar hyn o bryd," meddai.

"Dydi pobl ddim yn deall fod y neges yna mewn bodolaeth - ond pe byddech chi'n mynd ar ôl y neges yna mae yr un mor bwysig heddiw ag oedd pan oedd George Fox o gwmpas efo Sion ap Sion o Wrecsam.

"Yr ydych yn chwilio drosoch eich hun ond yn gwneud hynny y tu fewn i furiau fel petai - y cwrdd, lle yr ydych yn profi eich profiad chi yn erbyn beth mae pobl eraill wedi'i weld a beth mae pobl eraill yn ymwybodol ohono fo.

"Felly, dydych chi ddim yn dweud, Dwi'n credu hun a'r llall ac ati a dyna fo, dwi'n Grynwr. Yr ydych chi'n gorfod cyd-fynd efo'r pethau sylfaenol - hynny ydi, bod yna rywfaint o Dduw ym mhawb, bod Duw ym mhob un ohonom ni, fod pob person ydych chi'n i gyfarfod yn eithriadol o bwysig a dyna pam bod yna heddychwyr ymhlith y Crynwyr - os oes yna hynny o Dduw yn y person yr ydych chi'n i gyfarfod fedrwch chi mo'i ladd o na allwch?" meddai.