Yn ôl Cymraes sy'n byw yn China mae'r ymateb yn "ffyrnig" yn y wlad i'r protestiadau diweddar yn erbyn y wlad yn ystod taith y fflam Olympaidd drwy wledydd y Gorllewin.
Bu Nerys Avery yn byw yn y wlad ers deng mlynedd a dywedodd wrth John Roberts, cyflwynydd Bwrw Golwg ddydd Sul 13 Ebrill fod pobl gyffredin y wlad yn methu'n glir a deall pam mae'r holl wrthwynebiad i China.
M\en nhw hefyd yn ystyried pobl Tibet yn rhai anniolchgar iawn gan ddweud i China fod yn gyfrifol yn eu barn hwy am welliannau mewn gofal iechyd, addysg a chyflwr economaidd yno.
"Dwi wedi bod yn byw yn China ers tua deng mlynedd yn awr a dydw i erioed wedi gweld y fath undod ymhlith y bobl yn erbyn y Gorllewin ynglŷn â Tibet," meddai Nerys Avery.
"Mae pawb yma yn synnu oherwydd mae propaganda y Llywodraeth wedi bod mor gryf dyw'r bobl gyffredin ddim yn deall, ddim yn gwybod, beth yw'r gwirionedd - mae cant y cant o'r bobl yn credu propoganda'r Llywodraeth."
O'r rhai y bu hi'n siarad â hwy daw i'r casgliad nad yw'n sefyllfa ddu a gwyn rhwng Tibet a China gyda'r Gorllewin â golwg ramantus o Tibet fel rhyw fath o shangri-la.
"Ond dyw hi ddim fel yna mewn gwirionedd," meddai.
 Y sgwrs yn llawn rhwng Nerys Avery a John Roberts ar Bwrw Golwg ddydd Sul 13 Ebrill 2008.
Rhagor am Nerys Avery
 |
