 |
Heriwyd yr Annibynwyr yng Nghymru i ddadwneud hanner canrif o ddirywiad crefyddol yn y wlad a buddsoddi yn y dyfodol.
Mewn neges blwyddyn newydd ar gyfer 2007 mae Ysgrifennydd Cyffredinol yr Undeb, y Parchedig Dr Geraint Tudur, wedi galw ar i eglwysi i gymryd camau hyderus ymlaen "yn hytrach nag ildio i'r dirywiad sydd wedi digwydd yn ystod yr haner canrif ddiwethaf".
Gwers i'r Cristnogion
Meddai'r Dr Tudur:
"Ceir cryn sôn yn y wasg y dyddiau hyn am fuddsoddi ar gyfer y dyfodol. Tybed nad oes yn y fath awgrym wers i ni fel Cristnogion ac fel eglwysi Annibynnol?"
Ychwanegodd, "Y gwir yw bod angen i ninnau fuddsoddi ar gyfer yfory ac ar ddiwedd blwyddyn, neu ar ddechrau un newydd, dyma amser da i ni ystyried gwneud yn union hynny."
Creu grwpiau astudio
Trwy gyfrwng papur newydd yr Undeb, Y Tyst, gelwir ar i eglwysi wneud "buddsoddiad ysbrydol" drwy sefydlu astudiaethau Beiblaidd ar hyd a lled Cymru.
"Dylai pob eglwys o fewn yr Undeb fod yn gallu gwneud hyn. Y mae'n syml, yn ddidrafferth ac yn rhad ac am ddim!" meddai.
I hwyluso'r dasg, y mae nifer o weinidogion wedi cytuno i baratoi deunydd sydd, yn ôl Dr Tudur, yn "ddefnyddiol, dealladwy a pherthnasol".
Bydd y deunydd ar gael ar y we, trwy e-bost neu drwy'r post.
Ymhlith y canllawiau ar gyfer sefydlu astudiaeth Feiblaidd mae:
Fod cyn lleied â dau unigolyn yn ddigon i ffurfio 'grŵp' ond ni ddylai unrhyw grŵp gynnwys mwy na 10 o bobl. Dylid rhannu grwpiau mwy.
Fod y grŵp yn cyfarfod ar aelwyd.
Fod y grŵp yn cael ei arwain gan bersonau lleyg yn eu tro.
Y cyfarfodydd i barhau am lai na 50 munud, ac i gynnwys astudiaeth, amser byr i weddïo, cwpanaid o de neu goffi, a sgwrs.
Rhestrodd hefyd ei resymau pennaf dros gael grwpiau:
I roi gwybodaeth a dealltwriaeth well o gynnwys y Beibl a'r Efengyl
I adeiladu ein gilydd yn y ffydd
I arfogi ein hunain ar gyfer gwaith gweinidogaeth ymhlith ein cyd-aelodau
I gael cymdeithas Gristnogol mewn awyrgylch gynnes a braf
I sefydlu gweithgarwch y gallwn ei ddefnyddio i bwrpas cenhadol trwy wahodd pobl newydd i fod yn rhan ohono.
Pwysleisiodd y Dr Tudur nad yw'n fwriad ymyrryd lle mae
astudiaeth Feiblaidd yn barod dim ond annog yr astudiaeth honno i barhau.
Y cyfeiriad ar gyfer y rhai sydd am sefydlu grŵp yw:
Dr Geraint Tudur Tŷ John Penri, 5 Axis Court, Parc Busnes Glanyrafon, Bro Abertawe, Abertawe. SA7 0AJ. 01792-795888
ebost
ebostiwch BBC Cymru'r Byd gyda hanes a phynciau eich grŵp astudiaeth chi.
|
|
