Mae pryderon ynglŷn â dyfodol y ddau sefydliad yma wedi'u mynegi'n ddiweddar mewn papurau newydd ac ar y newyddion.

Mae dyfodol y Theatr yn ansicr ac yn ôl pob sôn bydd yn cau yn yr Hydref gyda chanolfan i'r celfyddydau perfformiadol yn cael ei hadeiladu rhywbryd yn y dyfodol.

Byddai cau'r Theatr yn ergyd drom i'r gymuned leol a thu hwnt gan ei bod yn rhan bwysig o fywyd diwylliannol y ddinas ac yn denu cynulleidfaoedd o bob rhan o Wynedd i weld perfformiadau.

Yr un mor ansicr yw dyfodol Amgueddfa ac Oriel Gwynedd. Prifysgol Bangor yw perchennog yr Amgueddfa ond ers blynyddoedd bellach Cyngor Gwynedd sy'n ysgwyddo'r baich ariannol o redeg yr Amgueddfa.

Oherwydd toriadau mawr y flwyddyn nesaf mae'r Cyngor wedi cyhoeddi y bydd hi'n fwyfwy anodd cefnogi'r Amgueddfa'n ariannol.

Mae cefnogwyr yr Amgueddfa wedi mynegi eu pryder ac yn ôl y Dr John Llewelyn Williams (Cyn-warden Neuadd John Morris Jones), ar ran cyfeillion yr Amgueddfa a'r Oriel, y mae ansicrwydd gwirioneddol ynglŷn â dyfodol yr Oriel sy'n cynnwys hen ddodrefn, casgliadau gwerthfawr a chreiriau archeolegol o bwys.

Byddai colli'r Amgueddfa, sydd wedi bod mewn bodolaeth ers sefydlu'r Brifysgol ym 1884, yn golygu colli rhan bwysig o hanes Bangor a'r Gogledd.

Dyma ddau sefydliad sydd â chysylltiadau agos iawn â'r Brifysgol yma ym Mangor. Tra bo'r Brifysgol yn ehangu ei gorwelion a denu myfyrwyr o bob rhan o'r byd oni ddylai fod yn gwarchod a chefnogi'r sefydliadau hynny o fewn y gymuned a'r ardal leol?