Roedd Wilfred Wooller yn un o chwaraewyr mwyaf amryddawn Cymru a chwaraeodd rygbi dros ei wlad, pêl-droed i Gaerdydd a chriced i dîm Morgannwg.

Ganed Wilfred yn Llandrillo-yn-Rhos yn 1912 i rieni o Fanceinion. Tra roedd yn dal i fod yn ddisgybl yn ysgol Rydal, chwaraeodd i dîm rygbi Cymru am y tro cyntaf pan enillodd y tîm yn erbyn Lloegr am y tro cyntaf yn Twickenham. Enillodd 18 cap dros ei wlad, gan gymryd rhan yn un o fuddugoliaethau enwog Cymru dros y Crysau Duon.

Ar ôl gadael prifysgol Caergrawnt, lle bu'n aelod o'r tîm criced, ymunodd â chwmni glo yng Nghaerdydd a chael ei anfon am ddau haf i oruchwylio gwaith y cwmni dramor, gan golli allan ar y tymor criced. Ond pan ddychwelodd i Gymru, ymunodd â thîm Morgannwg yn 1938 pan chwaraeodd ei gêm gyntaf yn erbyn Swydd Efrog a chafodd gant o rediadau yn erbyn India'r Gorllewin flwyddyn yn ddiweddarach. Ond bu'n rhaid iddo roi'r gorau i'w yrfa yn y byd chwaraeon am sbel pan ddaeth yr Ail Ryfel Byd.

Ar ôl treulio amser yng ngharchar Changi dan law'r Siapaneaid, dychwelodd i Gymru a thaflu ei hun i mewn i dîm criced Morgannwg eto yn 34 mlwydd oed. Roedd yn gapten yno am 14 mlynedd ac arweiniodd y tîm i ennill y Bencampwriaeth yn 1948 diolch i'r cyfuniad o'i frwdfrydedd o'r maes rygbi, ei strategaethau milwrol a'i bersonoliaeth gref. Dros y blynyddoedd daeth nifer i feddwl am enw Wooller a thîm Morgannwg yn gyfystyr â'i gilydd. Roedd yn ysgrifennydd ac yna yn llywydd ar Forgannwg am 36 mlynedd ac roedd hefyd yn ddewiswr i dîm criced Cymru a Lloegr o 1955 i 1961.

Bu farw Wilfred Wooller ar Fawrth 10 1997 yn 84 mlwydd oed. Yn 2001, agorwyd giatiau er cof amdano yng Ngerddi Sophia, cartref tîm criced Morgannwg.