Magwyd Dave Brailsford yn Neiniolen, ger Llanberis, ar ôl i'w deulu symud yno pan oedd o yn dair oed. Ysgogwyd ei ddiddordeb mewn beicio gan ei dad, oedd yn cynnal teithiau i'r Alpau. Ar ôl gadael yr ysgol, aeth at ei dad i Ffrainc i gystadlu fel beiciwr proffesiynol.

Dychwelodd i Brydain i astudio Gwyddoniaeth Chwaraeon ac ôl-radd mewn busnes. Gwnaeth y gorau o'i sgiliau busnes a'i frwdfrydedd am feicio pan gafodd ei benodi yn Reolwr Rhaglenni gyda British Cycling. Cafodd y tîm dipyn o lwyddiant yn Ngemau Olympaidd Athens yn 2004 o dan ei arweiniad, ac fe cafodd ei anrhydeddu gyda MBE gan y Frenhines am ei waith.

Yn 2005, penodwyd Dave yn Rheolwr Perfformiad i dîm beicio Prydain ac aeth ati i baratoi ar gyfer 2008. Llwyddodd i sicrhau arian i gyflogi ffisiotherapyddion, hyfforddwyr a seicolegydd chwaraeon i hybu perfformiad y beicwyr, gyda canlyniadau ardderchog.

Cipiodd beicwyr Prydain hanner y medalau aur ym mhencampwriaethau'r byd yn 2008. Yna, yn Beijing, llwyddodd y tîm i ennill saith allan o'r deg cystadleuaeth beicio (ar y ffordd ac o amgylch y trac), gan gynnwys tri i Chris Hoy, ac un yr un i'r Cymry Nicole Cooke a Geraint Thomas.

Fel diweddglo i flwyddyn orau ei yrfa hyd yn hyn, enillodd Dave Brailsford deitl hyfforddwr y flwyddyn yn seremoni gwobrwyo y BBC.

Mae Dave erbyn hyn yn byw yn Derby gyda'i bartner, Lisa, a'i merch fach, ond mae ganddo deulu yn byw yn ardal Deiniolen o hyd.