Erbyn i'r rhifyn hwn o Cwlwm gyrraedd o'r Wasg, mi fyddwn yn gwybod yn well a fu casgliadau Wythnos Cymorth Cristnogol mor llwyddiannus ag arfer. Nid yw'n argoeli'n dda oherwydd y "credit crynsh", y gosodiad yna sydd yn esgus am bob diffyg bellach.
Y mae ein partneriaid megis Jacob Nyirongo o Malawi yn poeni'n fawr y bydd tipyn llai o arian ar gael i'w ddosbarthu eleni. Bydd lleihad yn incwm Cymorth Cristnogol yn effeithio ar gymaint o gymunedau tlawd y byd, gan mai Cymorth Cristnogol yw'r mudiad gwirfoddol sydd yn dosbarthu'r symiau uchaf o grantiau rhyngwladol i bartneriaid sy'n gweithio i nerthu'r gwan a'r tlawd, a hynny mewn dros hanner cant o wledydd tlota'r byd.
Mi fydd llawer wrth gwrs, yn barod i ddatgan "pam ddylen ni boeni?! Nid dyma ein blaenoriaeth ni yn y sefyllfa ariannol bresennol. Nid ni sydd yn gyfrifol am gyflwr y tlawd. Nid yw tynged y tlawd yn ein dwylo ni.
Y gosodiad ar adnoddau Cymorth Cristnogol yw "Credwn mewn byw cyn marw". Mi fydd lleihad yn yr arian fydd ar gael i gynnal prosiectau ymhlith y tlawd yn fwy difrifol nag effaith y "credit crynsh" arnom ni, gan y bydd yn fater o fywyd neu marwolaeth i lawer.
Sut gallwn ni weithredu i ddiogelu'r gwan a'r tlawd pan fo prinder arian? Y mae Cymorth Cristnogol yn credu bod angen codi arian ond hefyd, fod angen ymgyrchu a gweithredu i newid yr hyn sydd yn cadw'r gwan yn dlawd.
Y mae tre Caerfyrddin a Sir Gaerfyrddin wedi gwneud ymdrech arbennig yn ddiweddar i ennill statws Masnach Deg, a hynny flwyddyn ar ôl i Gymru gofrestru fel y wlad Masnach Deg. Y mae yfed te a choffi, bwyta cacennau a ffrwythau, gwisgo dillad a mwynhau siocled o ddeunyddiau Masnach Deg yn gwneud gwahaniaeth mawr i incwm y tlawd ac yn cyfrannu at brosiectau cymunedol.
Yn ogystal â hynny, y mae'n sicrhau bod lleihad mewn llafur plant, a'u bod hwythau yn cael cyfle i fynd i'r ysgol yn lle gweithio ar y planhigfeydd coco ac ati.
Mi fyddwn yn ymfalchïo ein bod wedi gweld ffrwyth y gwaith caled i gyrraedd y statws, ac yn canmol yr ymdrech arbennig i brynu a defnyddio nwyddau Masnach Deg. Wrth gwrs, y mae'r gosodiad Masnach Deg yn awgrymu bod y fasnach arferol yn annheg, a dyna'r gwir, wrth gwrs. Dim ond gwneud yr hyn sydd yn iawn yw Masnach Deg.
Yr ydym ni yn rhannol gyfrifol am gyflwr y tlawd oherwydd masnach annheg a rheolau masnach ryngwladol sy'n anghyfiawn, fel y'm ni'n gyfrifol am dynged y tlawd oherwydd newid hinsawdd.
Camddefnydd a gorddefnydd o adnoddau'r byd gan y gwledydd sydd wedi datblygu sydd yn achosi'r problemau, a'r gwledydd a'r cymunedau tlawd sy'n dioddef waethaf yn sgil newid hinsawdd.
Y mae'r gwledydd cyfoethog bellach yn torri ar y gwasanaethau hanfodol, fel gofal iechyd ac addysg, er mwyn arbed arian ac osgoi codi trethu. Efallai y caf i gyfle eto i sôn am yr ymgyrch i dynnu sylw at y cwmnïau mawr sy'n osgoi talu treth yn y gwledydd tlawd a hynny'n tanseilio eu system addysg a gofal iechyd.
Y mae cymaint i'w wneud, hyd yn oed mewn sefyllfa o brinder, a all gyfrannu'n sylweddol at yr ymdrech i nerthu'r gwan a'r tlawd.
