Yn Gymro Cymraeg, magwyd John Hartson yn y Trallwn, Llansamlet. Roedd pêl-droed yn ei waed gan i'w dad Cyril chwarae i dîm pêl-droed Llanelli yn ystod y 1970au. Mae rhai o atgofion plentyndod hapusaf John yn cynnwys mynd i weld y Swans yn chwarae ar y Vetch efo'i ffrindiau a chael pastai a sglods ar y ffordd adref!

Yn 17 oed fe aeth John i Luton dan hyfforddiant ac ers 1992 mae wedi chwarae i chwech o'r prif dîmau.

Gwireddwyd addewid cynnar John pan symudodd i Arsenal am £2.5 miliwn ond yn dilyn symudiad Denis Bergkamp yno, doedd ei le yn y tîm ddim yn sicr felly fe symudodd Hartson i West Ham. Fe aeth Hartson i helynt yn dilyn ei ffrae gyda'i gyd chwaraewr Eyal Berkovic.

Symudodd i Wimbledon yn 1999 ond cafodd ei gyfnod gyda'r Dons ei amharu gan gyfres o anafiadau ac fe fethodd brofion meddygol a'i rwystrodd rhag ymuno gyda Rangers a Spurs.

Ond fe symudodd i Coventry yn 2001 ac fe ffurfiodd bartneriaeth gyda'i gyd-Gymro Craig Bellamy. Byr iawn y bu ei gyfnod yn Highfield Road oherwydd yn Awst 2001 fe ymunodd â Celtic am £6.5m, trosglwyddiad wnaeth atgyfodi ei yrfa.

Sgoriodd gôl wych yn Anfield wrth i Celtic drechu Lerpwl yn ail gymal rownd yr wyth olaf cyn trechu Boavista yn y rownd gyn derfynol. Yn Gymro tanbaid, mae John wedi mynegi ei ddiolch am ffydd Mark Hughes ynddo ar ôl cychwyn digon siomedig i'w yrfa dan arweiniad Bobby Gould.

Wedi cyfnod llwyddiannus yn yr Alban gyda Celtic, symudodd John i West Brom cyn ymddeol yn 2008.

Mae John Hartson wedi bod yn brwydro yn erbyn canser y ceilliau ers mis Gorffennaf. Mae'r afiechyd wedi lledu i'w ysgyfaint a'i ymennydd, ac mae'n parhau i gael triniaeth yn yr ysbyty yn Abertawe, lle mae ei gyflwr yn ddifrifol.

Ei funud fawr: cael ei enwi yn Bêl-droediwr y Flwyddyn Cymru yn 2001 a 1998. Cyn hyn fe enillodd y wobr am chwaraewr ifanc yn 1995 a 1996.