Un o'r chwaraewyr mwyaf enwog yn y gêm, mae'r asgellwr yma o Manchester United a Chymru wedi ennill bron bob cwpan neu fedal sydd ar gael i'w glwb, adref a thramor.
Wedi ei eni yng Nghaerdydd, symudodd Giggs a'i deulu i Fanceinion pan oedd o'n saith, ond gyda rhieni o Gymru ac yn ffyrnig o ffyddlon i'w wlad enedigol, doedd chwarae dros Loegr ddim yn ddewis iddo.
Pêl-droed oedd yn mynd â bryd Giggs ac yn 9 oed fe'i gwelwyd gan un o sgowtiaid Manchester City ac ar ôl hynny bu'n chwarae'n gyson mewn cystadlaethau lleol. Fe ymddangosai ar y cychwyn cyntaf mai i City y byddai Giggs yn chwarae ond yn 14 oed fe arwyddodd i dîm ieuenctid United.
Ar ôl blynyddoedd o hyfforddi fe wnaeth ei ddebut cyntaf yn 1991 ac mae'n aelod gwerthfawr iawn o dîm llwyddiannus Alex Ferguson.
Dydy o ddim wedi bod mor llwyddiannus yn rhyngwladol ond er hynny mae Giggs yn aelod allweddol o'r tîm. Dan arweiniad ei arwr a'i gyn gyd chwaraewr Mark Hughes, fe fydd Giggs yn allweddol yn nhîm Cymru yn y blynyddoedd nesaf.
Ei funud fawr: ennill y trebl gyda Manchester United yn 1999.
