Un o sêr mawr y byd rygbi
Wyddech chi? : Does na'r un o gêmau Jenkins yn gyflawn heb gyfraniad ei frawd-yng-nghyfraith yn gwisgo gwallt gosod coch a chlustiau plastig, yn cicio dafad blastig dros y postyn. Un o gewri mawr y byd rygbi, mae Neil Jenkins wedi cyhoeddi ei ymddeoliad o rygbi rhyngwladol ond dydy o ddim yn rhoi'r gorau i'r gêm yn llwyr.
Adnabyddir ef gan sawl enw megis 'Ginger Monster', 'Maestro' neu 'Magician' gan ennill y mwyaf o gapiau Cymru ac ef sy'n dal y record am y cyfanswm mwyaf o bwyntiau rhyngwladol gyda 1,049 o bwyntiau dros Gymru a 41 arall mewn pedwar prawf i'r Llewod.
Mae Jenkins wedi bod yn ffigwr parhaol yn nhîm Cymru ers ei ymddangosiad cyntaf yn 1991 er iddo gael ei feirniadu ar un adeg a'i ollwng am iddo fethu llenwi'r crys gystal â rhai eraill yn y crys 10.
Ond mae ei nerth a'i benderfyniad wedi tyfu'n symbolau o dîmau Cymru yn ystod y ddegawd ddiwethaf ac mae'r tîm heb Jenkins bron fel dychmygu Pobol y Cwm heb Kath Jones.
Fe chwaraeodd Jenkins ran flaenllaw yn llwyddiant Pontypridd yng nghanol 1990 gan helpu'r tîm o'r cymoedd i ennill teitl y gynghrair a chwpan y Principality.
Wrth chwilio am fwy o sialens fe symudodd i Gaerdydd, er yn ystod ei gyfnod yn y brif ddinas fel gafodd lawer o anafiadau.
Am ei fod yn methu ennill ei le yn y tîm, symudodd Jenkins yn ôl i Ffordd Sardis er mwyn cryfhau achos Pontypridd mewn cystadlaethau adref ac yn Ewrop.
Ym mis Mai 2003 fe gyhoeddodd ei ymddeoliad o'r gêm ryngwladol, ond dywed ei fod yn awyddus i adael y gêm mewn steil gyda blwyddyn dda o rygbi rhanbarthol cyn rhoi'r gorau iddi'n llwyr.
Ei funud fawr : Wrth chwarae dros y Llewod yn Ne Affrig yn 1997, fe newidiodd Jenkins ei safle i'r cefn a chicio'r Llewod i fuddugoliaeth 2-1 yn y gyfres gofiadwy.
