 |
|
Kong
ac Aslan
Gweld llais a chlywed llun neges y ffilmiau |
Sylwadau wythnosol Aled Edwards
Rhagfyr 18, 2005
Gan fod pethau wedi llacio rhywfaint ym myd gwleidyddiaeth
Cymru'r wythnos hon cefais gyfle i fwynhau seibiant bach a d wy ffilm
newydd.
Fe ddygodd y ddwy ffilm fi'n ôl i ddyddiau plentyndod pryd yr oeddwn,
yng ngeiriau cofiadwy Gerallt Lloyd Owen yn ei gerdd Yr Afon,
yn meddu ar dalent plentyn 'i weld llais a chlywed llun'.
King Kong
Un o'r ffilmiau cyntaf i godi ofn arnai oedd King Kong.
Hynny yw, y ffilm wreiddiol a gyhoeddwyd yn 1933, dros ugain mlynedd
cyn i mi gael fy ngeni.
Yr oedd y ffilm honno'n glasur gwirioneddol.
Fe ddygodd ofn a braw i sawl sinema a theledu du a gwyn yng nghartrefi
gogledd Cymru.
Y mae'n rhaid canmol Peter Jackson am ei waith technegol campus.
Drwy gyfrwng sepia tone llwyddir i ddwyn byd a aeth heibio
i'r llygad a'r glust gyfoes.
 Y
mae pob munud o'r ffilm newydd yn wledd glywedol. Ar ben hyn, cafwyd
perfformiadau cryfion gan y ddau brif actor, Adrien Brody a Naomi
Watts.
Er tegwch, y mae'r King Kong diweddaraf yn ystyried themâu
dyfnach na bwystfil yn rhamantu pum troedfedd ar hugain uwchben Naomi
Watts druan sy'n cael sawl ysgwydiad a fyddai'n codi poen pen arnaf
i.
Hyd y gwelaf, nid yw ein byd cyfoes yn trin natur a'i ryfeddod yn
well na'r rheibio amrwd sy'n cynnig llwyfan mor gryf i'r King Kong
gwreiddiol.
Mae'r un themâu yno yn ffilm Peter Jackson ond mae'r gwaith yn llawer
rhy hir.
Er cywilydd imi, dwi'n siwr imi gysgu rhywfaint wrth i'r criw deithio
o Efrog Newydd i'r ynys anghysbell sy'n gartref i Kong druan.
The Chronicles o Narnia
Gan taw ar aelwyd uniaith Gymraeg y cefais i fy magu, braidd yn hwyr
yn y dydd y clywais i gyntaf am waith C.S. Lewis.
Yn wir, cyfeillion Saesneg o argyhoeddiad Cristnogol ym Mhrifysgol
Llambed a'm cyflwynodd i'r llyfryn bychan hwnnw The Lion , the
Witch and theWardrobe.
Y mae blas Seisnig amlwg cyfnod arbennig yn treiddio drwy waith C.S.
Lewis gan ddwyn i gof cyfnod yr efaciwis druan a ddaeth yn
eu miloedd i ardaloedd gwledig.
Gwyddom erbyn hyn nad profiad diniwed oedd y cyfan i sawl un ohonyn
nhw. Wedi dweud hyn, arbedwyd llawer rhag bomio Adolf Hitler.
Cafwyd ffilmio da o law gywrain Andrew Adamson yn The Chronicles
of Narnia fel ag yn King Kong.
Cafwyd perfformiadau da hefyd gan yr actorion ifanc sy'n portreadu
pedwar plentyn y teulu Pevensie sy'n disgyn o dan ofal cariadus yr
Athro Digory Kirke sy'n cael ei actio'n annwyl iawn gan Jim Broadbent.
Aslan yn ennill
Geiriau un o gymeriadau King Kong sy'n egluro i mi pam y mae'r trafod
sy'n gorwedd o dan wyneb y ddwy ffilm yn per i The Chronicles of
Narnia ddod i'r brig yn fy ngolwg i.
 Pan
nad oeddwn yn cysgu wrth deithio o Efrog Newydd i'r ynys anghysbell
sy'n gartref i King Kong, dywedwyd y gallai actorion Hollywood deithio'r
byd a gweld dim ond drych.
Crisialu delweddau'r ffilm wreiddiol megis mewn drych y mae campwaith
Peter Jackson ond nid yw'n llwyddo i dreiddio'n ddyfnach na hynny.
I mi, y mae campwaith C.S. Lewis yn cynnig dehongliad oesol o'r hyn
a wnaeth Crist dros ddynolryw. Y mae rhyddid wrth gwrs i eraill weld
rhinweddau llawer symlach yn aberth Aslan ar faen llog Narnia.
Fe wnaeth King Kong imi glywed a gweld: fe wnaeth The Chronicles
of Narnia imi feddwl.
Yn fwy na hynny, fe barodd imi gredu drachefn ym Mab y Dyn a ddaeth
i fyw i'n plith y Nadolig cyntaf un.
Y mae rhyfeddod o'r fath y tu hwnt i ddawn aruthrol sepia tone
i greu lliw a llun.
King Kong
- gwefan ffilm
The Chronicles
of Narnia - gwefan ffilm
I ddarllen detholiad o Sgyrsiau Dweud ei Ddweud,
Post Cyntaf
Cliciwch
Ebostiwch ymateb
|
|
  |
 |
|
 |
|
Y Parchedig Aled Edwards yn rhoi'r byd
yn ei le. |
 |
|
|
|
Cofio
Gwenynen Gwent