 |
|
Llun
y camera
Peth peryglus yw barnu eraill ar sail yr hyn a welir
ar deledu |
Sylwadau wythnosol Aled Edwards
Mehefin 19, 2005
Bu farw'r newyddiadurwr praff hwnnw, Malcolm Muggeridge, yn Nhachwedd
1990.
Go brin y byddai unrhyw un o dan ugain oed yn cofio ei enw, hyd yn
oed.
Daeth un o'i sylwadau bachog yn ôl i'r cof nos Lun diwethaf wrth wrando
ar y rheithgor yn achos Michael Jackson yn dyfarnu ei fod yn ddieuog.
Taranau yn erbyn teledu lliw ar raglen Michael Parkinson wnaeth Malcolm
Muggeridge gan gwyno bod y cyfrwng newydd hwnnw yn fwy tebygol o roi'r
argraff bod yr hyn y mae'r gwyliwr yn ei weld yn wir.
Gwyddai'r sawl a oedd yn gweld llun mewn du a gwyn taw llun ydoedd.
Gall y camera ddweud celwydd.
Gall y camera o ddatblygu o gynnig llun du a gwyn i gynnig lliwiau
cyfarwydd gynyddu'r twyll ynghylch yr hyn a welir.
Cyfryngau cyfoes
Er mawr gywilydd i mi, gwelais yn dda i wylio dehongliadau lliwgar
teledu Sky o'r achos yng Nghaliffornia bell.
 Byddaf
wrth fy modd yn gweld cyfreithwyr wrth eu gwaith.
Teledu, wrth gwrs, ddechreuodd helynt ddiweddaraf Michael Jackson.
Go brin y bydd Martin Bashir yn cael gwahoddiad i Neverland yn y dyfodol
agos.
Yn yr holi a gafwyd rhwng Bashir a Thomas Mesereau, cyfreithiwr Jackson,
fe ddaeth y gyfraith wyneb yn wyneb â newyddiadura ac ar Sky, roedd
y cyfan yn ddrama.
Roedd y cyfan a welais nos Lun ar News 24 hefyd yn ddrama.
Daeth rhyw droad i'r stumog wrth feddwl y byddai rhywun yn sicr o
ddioddef yn sgil y dyfarniadau a oedd ar ddod.
Dyfarniad personol
Rhaid imi gyfaddef imi gael, ar ôl gwylio, y dyn, dieuog, yn euog
parthed sawl cyhuddiad!
Ond yn wahanol i ni cafodd y rheithgor gyfle i weld y cymeriadau byw
yn yr achos o'u blaenau: Jason Francia, Star Arvizo, June Chandler,
Janet Arvizo a Michael Jackson ei hun.
Hwy hefyd fu'n eistedd drwy'r cyfan am oriau maith a gorfod teithio'n
fanwl drwy gyfarwyddiadau'r barnwr.
Tybiaf felly taw peth peryglus efallai yw dyfarnu eraill yn euog ar
sail yr hyn a welir drwy ail bortreadau'r camera lliw.
Ceir gwahaniaeth rhwng cyfiawnder a drama a theg yw i ddyn a ddyfarnwyd
yn ddieuog gerdded â'i draed yn rhydd.
Gair i gall
Flynyddoedd yn ôl gwelodd un o aelodau anwylaf Eglwys Dewi Sant, Caerdydd,
yn dda i gynnig sylw ar ôl fy ngweld ar y teledu.
Rhoddais iddi'r ateb arferol fy mod yn edrych yn well ar radio.
"Na," meddai hithau'n fachog. "Da chi'n edrych yn well ar y teledu
nag yr ydych chi mewn gwirionedd."
Erys argyhoeddiad ar fy rhan, ar ôl gweld y cyfan, bod dyn canol oed
a wahoddodd fechgyn ifanc i'w wely yn euog o rywbeth.
I ddarllen Sgyrsiau Dweud ei Ddweud, Post Cyntaf
Cliciwch
Ebostiwch ymateb
|
|
  |
 |
|
 |
|
Y Parchedig Aled Edwards yn rhoi'r byd
yn ei le. |
 |
|
|
|
Cofio
Gwenynen Gwent