 |
|
Un
o bobl y byd
Wythnos o dderbyn a threulio newyddion mewn gwahanol ffurf
|
Sylwadau wythnosol Aled Edwards
 Awst
29, 2004.
Y mae'r sticer car glas a du trawiadol o eiddo papur dyddiol
Cymraeg arfaethedig Y Byd yn ddefnyddiol.
Gan amlaf, y mae'n dweud wrth y rhai sydd mor anffodus a gorfod fy
nilyn ar daith fy mod yn Gymro Cymraeg.
Mewn meysydd parcio mawr y mae hefyd yn hynod o ddefnyddiol gan fy
mod y dyddiau yn cynyddol anghofio lle y byddaf yn gadael fy nghar.
Nid oes angen poeni am hynny medda' nhw. Pan fyddaf yn anghofio beth
ydi car, fe fydd yn rhy hwyr i boeni.
Y mae'r sticer car hwn hefyd yn dweud fu mod yn Gymro Cymraeg sydd
am drafod ei fyd a byd eraill drwy gyfrwng iaith ei hun.
Cefais fy magu felly achos ar ein haelwyd ni yn Nhrawsfynydd roedd
yr Herald yn cydorwedd yn dda â'r Daily Mirror.
Trist oedd clywed yr wythnos hon am dranc yr Herald. Roedd
yn un o'r cyfryngau cynnar hynny a'm galluogodd i ddeall yr hyn a
oedd yn digwydd o nghwmpas.
Yn un peth, hwn oedd y papur a fyddai'n dweud rhywbeth o bwys am deuluoedd
milwyr Cymraeg Gwynedd a fyddai'n colli eu bywydau mewn rhyfeloedd
pell. Yr oedd yn adrodd eu stori.
Helynt byd ar y rhyngrwyd
Ar dudalen cyfrwng llawer mwy cyfoes, BBC Cymru'r Byd, y cyfrwng hwn,
y clywais gyntaf am fwriad Adam Price i uchel gyhuddo Tony Blair am
ei benderfyniad i fynd i ryfel ag Irac.
 Ar
y rhyngrwyd, gellir achub y blaen hyd yn oed ar newyddiadurwr siarp
fel Martin Shipton o eiddo'r Western Mail. Cael cyfle i ddweud
mwy am yr hyn yr oeddwn eisoes yn ei wybod gafodd y Western Mail
fore Iau diwethaf. Cawn weld beth ddaw o'r cyfan.
Erbyn hyn, fe drodd y rhyngrwyd yn llyfrgell, yn gyfrwng cyfathrebu
ac yn fwy na dim, y man lle byddaf yn clywed newyddion gyntaf.
Helynt y peiriant ateb
Wrth deithio'n ôl i Gilfynydd nos Fercher diwethaf, y noson y
clywais gyntaf am fwriad Adam Price i uchel gyhuddo Tony Blair, cefais
alwad ffôn gan gyfaill o Irac sy'n feddyg dawnus a bellach yn byw
yng Nghaerdydd.
Ar ôl brwydr hir a gwaith caled a thawel gan ei aelod seneddol, Alun
Michael, fe glywodd yr wythnos hon, ein bod am ganiatáu iddo aros
yma fel ffoadur.
Ni allwn ateb y ffôn symudol pan ddaeth yr alwad. Roeddwn yn gyrru'r
car ar y pryd. Roedd rhywun mewn fan wen eisoes yn fy melltithio am
barchu'r gyfraith drwy gadw at y cyflymdra a benodwyd ar gyfer Pontypridd.
Wrth barcio fy nghar ar ochr y lôn gwelais yr ystum anweddus yn y
drych. Go brin y bydd yn prysuro i brynu'r Byd.
Clywais am newyddion da fy nghyfaill o Irac drwy ddefnyddio'r holl
ddefnyddiol '901' ar fy ffôn symudol.
Tu Hwnt i'r newyddion
Gwelais yn dda ar ochr y lôn i ganiatáu i'r peiriant ateb redeg
ei gwrs. I mi gofio, roedd naw neges yn fy nisgwyl tu hwnt i ddôr
ag allwedd cyfoes y '901' hollbwysig.
Bu'n rhaid imi wrando eto ar neges nad oeddwn wedi ei chlirio - cais
gan wraig ddagreuol.
Bythefnos yn ôl, roedd ei gwr yn un o gaethion lloches Caerdydd. Erbyn
hyn, fe gafodd ei estraddodi i'r Almaen. Cafodd gyfnod yno cyn teithio
i Loegr.
Y mae'r wraig hon, sydd hefyd yn hanu o Irac, saith mis yn feichiog.
Y mae ganddi fab wyth oed o briodas flaenorol. Fe gafodd ei gwr cyntaf,
yn ôl yr hyn a ddywed, ei ladd mewn cyrch bomio o eiddo'r cynghreiriaid
yn Irac yn ystod y nawdegau.
Cyn ei dileu o'm rhestr '901' roeddwn yn meddwl y byddwn yn ei chrybwyll
yma'n gyflym fel un o bobl y byd.
Y mae'n un o filoedd sydd tu hwnt i'n holl gyfryngau a'n newyddion.
Peth felly, mewn gwirionedd yw'r newyddion.
Cyhuddo Blair
Ebostiwch eich ymateb
|
|
  |
 |
|
 |
|
Y Parchedig Aled Edwards yn rhoi'r byd
yn ei le. |
 |
|
|
|
Cofio
Gwenynen Gwent