 |
|
Mewn
dau gae
Hiliaeth - a ddylem ni bryderu yng Nghymru? |
Sylwadau wythnosol Aled Edwards
Mai 2, 2004
Cyhuddiad yn erbyn poster
yn llygaid ei le
Ar y diwrnod y torrodd y stori fod rhai o aelodau'r Cynulliad yn anfodlon
i boster gwrth derfysgaeth yr heddlu gael ei arddangos am ei fod yn
awgrymu rhywbeth anffafriol ynghylch gwragedd Mwslimaidd, cefais fy
hun yn rhannu sgwrs iasol a gyrrwr tacsi.
Digwyddodd y cyfan wrth deithio ar hyd y ffyrdd gwledig braf hynny
rhwng Sain Ffagan a Radur.
Roedd hi'n ddiwrnod hynod o braf.
Yng ngwres yr haul cefais gyfle i ystyried os oedd aelodau cydwybodol
Plaid Cymru wedi mynd â'u argyhoeddiadau PC am yr heddlu yn rhy bell
y tro hwn.
Nid yn annisgwyl, mynegwyd hynny'n uchel iawn gan David Davies, aelod
y Cynulliad ar gyfer Mynwy.
Hanu
O ran ei acen, deuai'r gyrrwr tacsi yn amlwg iawn o Gaerdydd. O ran
lliw ei groen, roedd ei gyndadau yr un mor amlwg yn hanu o rywle arall.
Cyfaddefais innau fy mod yn hanu'n wreiddiol o'r gogledd ac yntau
wedi sylwi bod gen i acen od.
Atebodd yntau yn siriol ei fod yn hanu'n wreiddiol o'r dwyrain. Gorwedd
Pacistan rhywle yn y dwyrain!
Holodd beth oeddwn yn ei wneud yn stiwdio ITV Cymru ar gyrion Caerdydd.
Yn ofalus, dywedais fy mod wedi gwneud cyflwyniad ar fethiant y ceisydd
lloches ifanc hwnnw o Kosovo i aros yng Nglyn Ebwy.
Mae'n rhaid bod yn ofalus gan imi gael ar fwy nag un achlysur lond
clust o rethreg hiliol gan yrwyr tacsis Caerdydd heb ddweud dim am
fy ngwaith na'm diddordeb ym mhobloedd di-le'r byd.
Er mawr ofid, yn ystod y misoedd diwethaf hyn, fe ddaeth hiliaeth
yn dderbyniol mewn rhai cylchoedd.
Erfyniaf am onestrwydd ynghylch yr hiliaeth hon sy'n gynyddol godi
ei phen.
Galwodd Ron Atkinson y pêl droediwr du ei groen, Marcel Desailly,
yn "f… lazy thick nigger".
Mae'r parodrwydd i feddwl y fath beth, heb sôn am ei ddweud, yn deillio
o gymdeithas sy'n newid er gwaeth. Anodd derbyn eglurhad Atkinson
taw siarad ydoedd fel 'fan'. Mae hynny'n gwneud y peth yn waeth
o s rhywbeth.
Yn ofalus gwrtais fe drodd y sgwrs yn y tacsi at hiliaeth.
Cytundeb
Rhwng pedair olwyn, cytunodd y dyn o'r gogledd a'r dyn o'r dwyrain
fod tro ar fyd ar droed. Y mae Prydain yn troi'n llai goddefol ynghylch
hil.
Yn dawel, dechreuodd gyfaddef sut yr oedd yn pryderu'n gynyddol am
ddiogelwch a lles ei blant a'i wraig. Y mae hi hefyd yn hanu o'r un
Dwyrain.
Nid yn annisgwyl efallai, roedd yn eithaf awyddus i gyfrif ei hun
yn Brydeiniwr. Gan fod y sgwrs yn mynd yn dda nid oeddwn am ddifetha'r
cyfan trwy ddatgan nad oedd gennyf ddiddordeb yn y byd mewn dilyn
yr un hunan adnabyddiaeth.
I mi, mae cael bod yn Gymro yn llawn ddigon diolch yn fawr.
Troi i'r caeau
Mewn gwendid weithiau, byddaf yn meddwl yn lle y byddwn yn caru byw
pe byddai Cymru yn peidio â bod yn lle addas ar gyfer Cymro fel fi.
Yn Gymru nad yw'n dymuno bod yn genedl.
Er fy mod yn hynod hoff o'r Albanwyr a'r Gwyddelod sylweddolaf nad
wyf yn un ohonyn nhw. Hyd yma, glynaf wrth yr ochenaid 'ni allaf
ddianc rhag hon.' Nid oes caeau eraill ar fy nghyfer.
Digwydd cyfaddef wnaeth fy nghyfaill o'r dwyrain, sy'n gyrru tacsi
yng Nghaerdydd, ei fod wedi prynu dau gae ym Mhacistan rhag ofn i
bethau droi'n hyll yma.
Mewn un ffordd, dwi'n falch fod ganddo gaeau i droi atyn nhw. Ond,
y mae'r ffaith ei fod hyd yn oed yn meddwl y peth yn llefaru cyfrolau.
Mae'n wirioneddol ddrwg gennyf gyfaddef. Roedd yr hyn a ddywedodd
Plaid Cymru am lygaid y poster arbennig hwnnw o eiddo'r heddlu yn
llygaid ei le.
Ebostiwch eich ymateb
|
|
  |
 |
|
 |
|
Y Parchedig Aled Edwards yn rhoi'r byd
yn ei le. |
 |
|
|
|
Cofio
Gwenynen Gwent