 |
"Ma'r pabi coch yn ein hatgoffa amdano bob amser."
Perthyn
Gwen Jones, Sbarc!, Galeri Caernarfon
|
|
Gwreiddyn yn nhir tramor
Mae'r teimlad o berthyn i Ffrainc yn magu fwyfwy wrth i Gwen a'i theulu ddarganfod fod yna gysylltiad teuluol i'r wlad.
Stori ddigidol gan Sbarc!, Galeri Caernarfon. Gyda diolch i Sbarc!
Perthyn gan Gwen Jones
Mi rydan ni'n licio mynd i Ffrainc am wylia, ac wedi bod sawl gwaith. Ma' Dafydd, y gŵr yn enwedig yn teimlo'n gartrefol yno a theimlo ei fod yn perthyn. Mae o'n hoff o'r bloda' haul, yr ymlacio a'r gateau. Ond erbyn hyn, ma' 'na reswm arall hefyd.
Ar ol i ni fod yna'r tro cynta' yn 1975 a deud yr hanas wrth rieni Dafydd, dyma'i dad yn deud fod ei dad o wedi ei gladdu yn Boulogne. Rodda ni'n gw'bod fod taid Dafydd wedi ca'l ei ladd yn y Rhyfel Mawr ond dyma'r tro cynta' i ni gl'wad am y fan a'r lle. Mi gawson ni w'bod yn reit sydyn o'r War graves commision yn Llundan ac wedyn mi naetho' ni drip arbennig i chwilio amdano.
David David Jones o'dd ei enw, ac mi fuo fo farw yn saith ar hugain oed yn 1917. Ro'dd y fynwant ar y Rue St Omer yn Boulogne. Lle hyfryd a graen haeddiannol arni. Mi ddaethon ni blanhigyn a grug o Eryri ar y bedd ac aros gryn dipyn i ni ga'l llunia arbennig i fynd adra i Tom, tad Dafydd. Anodd coelio na welodd 'rioed mo'i dad, na chwaith ei fedd. Ni o'dd y rhai cynta' o'r teulu i fod yno, a 'da ni'n mynd bob tro y bydda ni yn ardal Boulogne.
Ma' rhai o'n teulu ni wedi bod yna yn achlysurol hefyd. Y d'wrnod y gwelish i rai o'n plant a'n hwyrion ni yn sefyll wrth y bedd nesh i sylweddoli mai yno o'dd un o'u gwreiddia a bod David David Jones yn r'an enfawr ohonyn nhw. Mi deimlish i i'r byw.
Ma'r pabi coch yn ein hatgoffa amdano bob amser ac felly ro'dd gweld pabi coch mewn cae yn Ffrainc yn reswm arall dros ein hoffter o'r lle, ac mai yn ei thir ma'r dynfa i Dafydd fynd yno. Rhyfadd o fyd. Ma' miloedd o'r bedda' yma yn Ffrainc a ma' nhw'i gyd yn perthyn i rywun.
Eich sylwadau...
Beth ydych yn meddwl am y stori yma?
Gadewch i ni wybod. | |
|
