O hyn ymlaen, Crusaders Rugby League fydd enw'r clwb o Gymru sy'n chwarae yn y Super League.

Yn ôl prif weithredwr y clwb, Mike Turner, y rheswm am y newid yw er mwyn cael gwared â'r cysylltiad gyda'r cyn-glwb rygbi'r undeb y Rhyfelwyr Celtaidd.

Bu'r Crusaders yn defnyddio'r un stadiwm a'r Rhyfelwyr Celtiadd ym Mhen-y-bont ar ôl i'r rhanbarth ddod i ben.

Ond bellach, mae'r Crusaders wedi symud i Gasnewydd ac wedi penderfynu bod angen creu brand newydd.

"Rydym wedi bod yn gweithio'n galed ar adeiladau clwb sy'n cynrychioli Cymru ac nid un ardal yn unig," meddai Turner.

"Yn y gorffennol, roeddem yn cael ein cysylltu yn ormodol gyda'r hen ranbarth y Rhyfelwyr Celtaidd."

Yn ogystal â sicrhau cartref newydd, mae'r clwb wedi gweddnewid y tîm hyfforddi drwy benodi Brain Noble, Jon Sharp ac Iestyn Harris.

Mae'r clwb hefyd yn gobeithio arwyddo nifer o chwaraewyr newydd ym mis Tachwedd.

Gorffennodd y Crusaders ar waelod y Super League ar ôl eu tymor cyntaf yn y gynghrair eleni.