Dechreuodd Cymru chwarae gemau rhyngwladol ym 1881 wrth iddynt herio Lloegr ac erbyn 1883, gan fod y Pedair Undeb yn chwarae gemau yn erbyn ei gilydd, ffurfiwyd Pencampwriaeth y Pedair Gwlad.

Lloegr oedd buddugwyr cyntaf y Bencampwriaeth wrth iddynt ennill y Goron Driphlyg ym 1883 a 1884 a chasglodd Cymru eu buddugoliaeth gyntaf a'r Goron Driphlyg ym 1893.

Ym 1906, dechreuodd y pedair gwlad herio Ffrainc yn flynyddol, a chafodd y Ffrancwyr eu cynnwys yn swyddogol ym Mhencampwriaeth y Pum Gwlad ym 1910.

Yn dilyn Pencampwriaeth 1931 cafodd Ffrainc eu diarddel o'r Bencampwriaeth wedi honiadau eu bod yn talu eu chwaraewyr - rhywbeth oedd yn gwbwl yn erbyn ethos amatur y gamp.

Wedi'r Ail ryfel Byd, a chyda Ffrainc yn ôl yn y gystadleuaeth, aeth y Bencampwriaeth o nerth i nerth gyda thorfeydd uchel yn y meysydd ac ar y teledu.

Ym 1972 ni chafodd y Bencampwriaeth ei chwblhau wedi i'r Alban a Chymru wrthod teithio i chwarae yn Iwerddon oherwydd bygythiad terfysgol yr IRA.

A blwyddyn yn ddiweddarach cafwyd sefyllfa unigryw wrth bob gwlad ennill dwy gêm yr un a bu rhaid i'r pum gwlad rannu'r Bencampwriaeth.

Cafodd tlws y Bencampwriaeth ei chyflwyno am y tro cyntaf ym 1993, gyda Ffrainc y wlad gyntaf i'w derbyn wedi eu buddugoliaeth y flwyddyn honno.

Wedi blynyddoedd o geisio sicrhau eu lle yn y Bencampwriaeth, cafodd Yr Eidal eu hychwanegu yn 2000 er mwyn creu'r Chwe Gwlad.