Dim ond dwy fuddugoliaeth y mae Jenkins wedi eu sicrhau - yn erbyn Canada ac Ynysoedd y Môr Tawel - ers cymryd yr awenau ym mis Ebrill 2006.

"Hyd yn oed os ydyn ni yn colli yn erbyn Lloegr, 'dwi ddim yn credu bod bygythiad i fy swydd," meddai.

"Fydde fe ddim yn beth neis i gael y llwy bren. Byddai'n siomedig ac yn gywilyddus. Ond nid wrth ddiswyddo hyfforddwyr mae llwyddo yn y byd rygbi, yn enwedig chwe mis cyn Cwpan y Byd.

"Mae pethau'n tyfu yma yng Nghymru fydd yn rhoi cyfle llawer gwell i ni fod yn llwyddiannus - os ydyn ni'n newid yr hyfforddwr yn rhy aml rydyn ni'n mynd i ddioddef y tymhorau fyny ac i lawr 'ma.

"Dylai fod 80% o'r gwaith yn cael ei wneud yn y rhanbarthau gyda fi'n gweithio ar yr 20% olaf efo'r tîm cenedlaethol.

"Nid yw hynny'n digwydd, ac nid beirniadaeth ydi hynny ond realiti'r sefyllfa."

Ac roedd Jenkins yn feirniadol o'r penderfyniad ym 1995 i ddiswyddo Alan Davies wedi i Gymru golli pob gêm yn y Chwe Gwlad, fisoedd yn unig cyn Cwpan y Byd yn Ne Affrica.

"Ry' chi'n sôn am dair neu bedair blynedd o waith paratoi yn cael ei chwalu gan fod pobl yn rhwystredig.