Bydd Chris Czekaj, gafodd ei adael allan o'r garfan ar gyfer Profion yr hydref, yn dechrau ei gêm gyntaf ym Mhencampwriaeth y Chwe Gwlad ar yr asgell arall oherwydd anafiadau i Mark Jones a Shane Williams.

A chyda Thomas allan o'r gêm mae Hal Luscombe yn symud i'r asgell gyda Jamie Robinson yn dod oddi ar y fainc i chwarae yn y canol.

Mae modd i Gymru apelio yn erbyn y gwaharddiad ond dywedodd ERC y byddent wedi gallu gwahardd y cefnwr am hyd at 12 wythnos.

"Yn amlwg rydym yn siomedig tu hwnt, ond roeddem wedi paratoi ar gyfer hyn a bydd rhaid i ni ymdopi â her y Gwyddelod ar sail hyn," meddai Jenkins.

Dywedodd prif weithredwr Undeb Rygbi Cymru, Roger Lewis: "Bydd yr Undeb a'n cyfreithwyr yn ystyried oblygiadau'r penderfyniad yma'n ddwys."

Mae Jenkins, wedi dewis Gethin Jenkins a Chris Horsman yn y rheng flaen wrth iddo ddewis pac grymus er mwyn herio blaenwyr Iwerddon.

Mae'n siŵr bod gweld blaenwyr Munster, sydd â chwe aelod o'u pac yn nhîm Iwerddon, yn cael eu chwalu gan Gaerlŷr yng Nghwpan Heineken wythnos diwethaf wedi dylanwadu ar benderfyniad Jenkins .

Stephen Jones fydd yn arwain y tîm o safle'r maswr gyda James Hook yn gwisgo crys rhif 12.

Roedd tîm rheoli Cymru wedi oedi cyn cyhoeddi'r tîm er mwyn rhoi cyfle i Jones (clun) a Williams (ffêr) brofi eu ffitrwydd ond methodd y ddau brawf ffitrwydd hwyr ddydd Iau.

Bydd Ryan Jones yn chwarae ei gêm ryngwladol cyntaf ers y gêm yn erbyn Iwerddon yn Stadiwm y Mileniwm yn 2005, ac ef fydd yn gwisgo'r crys rhif chwech sydd wedi creu cymaint o gur pen i Jenkins.

Alix Popham fydd yr wythwr, gyda Martyn Williams yn cwblhau'r rheng ôl ac Ian Gough ac Alun Wyn Jones fydd yn chwarae yn yr ail reng.