Bu Morgan, sy'n 35, yn ddirprwy i reolwr Bangor Nev Powell ers ychydig dros ddwy flynedd, gan helpu'r clwb i ennill Cwpan Cymru dwywaith yn olynol.

Christian Edwards, sydd wedi bod wrth y llyw ers ymddiswyddiad Brian Coyne ym mis Medi, fydd is-reolwr newydd Morgan.

Mae Morgan, fu wrth y llyw gyda Derwyddon Cefn am gyfnod byr, yn bennaeth ar academi Tranmere Rovers ac yn gweithio tuag at sicrhau trwydded Hyfforddi A Uefa.

"Rydym wrth ein boddau gyda phenodiad Alan," meddai rheolwr gyfarwyddwr Aberystwyth Tony Bates.

"Mae hyn yn sicrhau fod y clwb yn gallu defnyddio profiad hyfforddi eang Alan tra ar yr un pryd yn ein galluogi i adeiladu ar y gwaith gwych mae Christian wedi ei wneud fel rheolwr dros dro."

Mae Morgan yn ewythr i gapten y clwb, Bari Morgan.

Roedd cyn-reolwr Y Rhyl Alan Bickerstaff a chyn-reolwr Llanelli Leighton James wedi cael eu hystyried ar gyfer swydd ar Goedlan y Parc.

Mae Aberystwyth wedi codi i'r chweched safle yn Uwch Gynghrair Cymru yn dilyn tair buddugoliaeth yn olynol.