|
Roedd goliau gan David Vaughan ac Aaron Ramsey yn ddigon i drechu tîm gwaetha'r grŵp yn Vaduz yng ngem olaf yr ymgyrch aflwyddiannus yn rowndiau rhagbrofol Cwpan y Byd 2010. A dywedodd Toshack: "Roeddem ni'n haeddu ennill ac efallai y bydda ni wedi gallu sgorio un neu ddwy arall. Dwi'n hapus gyda'r canlyniad. "Roedd 'na chwech neu saith gyfle da i sgorio. Aeth dau o'r rheini i mewn ac ar y cyfan roedd hi'n ganlyniad haeddiannol. "Fe roddom ni'r bêl i ffwrdd ar adegau yn wastraffus. Roedd lle i wella o ran safon y chwarae ond roedd yr ymdrech yno - fedra i ddim beirniadu'r chwaraewyr am hynny." Roedd James Collins yn gapten ar ei wlad am y tro cyntaf yn absenoldeb Craig Bellamy, a dywedodd yr amddiffynnwr mai ennill oedd y peth pwysig. "Mae hi wastad yn braf ennill," meddai Collins, oedd ddim ar ei orau nos Fercher. "Dwi ddim yn rhy hapus gyda'r perfformiad ond mae hi'n anodd dod i le fel hyn felly 'da ni'n hapus i ennill. "Fe wnaeth Liechtenstein pethau'n anodd i ni. Fe gawsom ddigon o feddiant ond roedden nhw'n anodd eu torri i lawr. Fe wnaethom ni gadw ati yn dda."
 |
