|
"Wrth i'r gêm fynd yn ei blaen, roeddwn i yn synhwyro y bydden ni'n llwyddo i gael canlyniad. Roedd hi'n waith caled eithriadol, ond fe wnaethon nhw yn arbennig o dda yn fy marn i," meddai Toshack.
"Dwi i'n hynod o falch gyda nhw, yn enwedig o ystyried nifer y chwaraewyr oedd yn absennol."
Er i Gymru fethu a chreu nifer fawr o gyfleoedd yn Frankfurt, fe arhosodd yr amddiffyn yn gadarn, gyda Danny Gabbidon a James Collins yn perfformio'n arwrol yn y cefn.
Er iddyn nhw sicrhau pwynt annisgwyl, fe gwympodd tîm Toshack i'r pumed safle yng ngrŵp 10 ar ôl i Slofacia guro San Marino.
Fe ddaeth y canlyniad campus yn erbyn yr Almaen, tridiau ers i Gymru achub pwynt erbyn Gweriniaeth Iwerddon, gan sicrhau diweddglo calonogol i'r ymgyrch.
"Fe gollon ni sawl chwaraewr ar hyd y ffordd, a bu'n rhaid i nifer o chwaraewyr ifanc sefyll yn y bwlch," meddai Toshack.
"Cafwyd perfformiadau siomedig oddi-cartref yng Nghyprus ac yn Nulyn ac wedyn adref yn erbyn yr Almaen a Slofacia.
"Ond wedi dweud hynny roedd wyth o'r perfformiadau yn rhai da, felly mae wyth allan o 12 yn ganran digon boddhaol ar y cyfan."
 |
