Rhwydodd Brigit Pinz, chwaraewyr y flwyddyn Fifa yn 2005, hat-trick wrth i Bencampwyr y Byd sicrhau buddugoliaeth gyfforddus ar Ddol y Bont.

Ac er nad oedd disgwyl i Gymru guro'r Almaen, sydd wedi ennill pedwar Pencampwriaeth Ewrop o'r bron, roedd Ludlow'n chwyrn iawn ei beirniadaeth o'r FAW a'r diffyg arian sydd ar gael.

"Mae'n sefyllfa hurt, mae'n rhywbeth 'dwi wedi dioddef trwy gydol fy ngyrfa gyda'r FAW," meddai Ludlow, sydd yn rhan o dîm llwyddiannus merched Arsenal enillodd Uwchgynghrair Lloegr, Cwpan FA Lloegr a Chwpan Uefa y tymor yma.

"Mae pêl-droed merched yn cael lot fawr o sylw, ond 'does 'na'm llawer o arian yn cael ei roi i mewn i'r gêm yn y wlad yma.

"Roedden ni'n gobeithio mynd i chwarae yng Nghwpan yr Algarve a chwarae pedair gêm gyfeillgar mewn wythnos ond ni fydd hynny'n digwydd rŵan am ryw reswm neu'i gilydd.

"'Dwn i ddim be' mae pobl yn disgwyl pan 'da ni ond yn cwrdd dwywaith y flwyddyn, os hynny," ychwanegodd.

Ymatebodd llefarydd ar ran yr FAW trwy ddweud: "Mae tîm merched Cymru wedi chwarae naw gêm ryngwladol y tymor yma - mwy nag erioed o'r blaen.

"Dyn ni wrthi'n trefnu calendr y tymor nesaf ac rydym yn gobeithio bydd modd trefnu gêm gyfeillgar cyn y gêm nesaf yn erbyn yr Iseldiroedd (ym mis Awst)."