Ond mae disgwyl i'r chwaraewr 26-mlwydd-oed ffurfio partneriaeth yng nghanol cae gyda Carl Robinson, fydd yn chwarae mewn safle amddiffynol, a Jason Koumas, fydd yn cael rôl greadigol.

Mae hynny'n golygu na fydd lle i chwaraewr Caerdydd, Paul Parry a Joe Ledley, wrth i Toshack fynd â phatrwm 5-3-1-1.

Gyda Ryan Giggs wedii anafu, bydd Craig Bellamy yn cymryd rôl y capten ac yn chwarae yn y llinell flaen ynghyd â Rob Earnshaw.

Ac mae anafiadau i James Collins, Mark Delaney a Sam Ricketts yn golygu bod y tîm yn brin o brofiad yn yr amddiffyn.

Mae disgwyl i Gareth Bale a Lewin Nyatanga, sydd yn eu harddegau, i ffurfio partneriaeth ifanc ynghyd â Richard Duffy, Rob Edwards a Danny Gabbidon - sydd yn 27-mlwydd oed, yr hynnaf o'r pump.

Bydd y golwr, Paul Jones, sydd yn 40 ym mis Ebrill, yn casglu ei 50ed cap.

Bellamy, fydd capten Cymru ar gyfer y ddwy gêm yn absenoldeb Ryan Giggs er ei fod yn ymddangos yn y llys wythnos nesaf.

Mae Bellamy yn mynd o flaen ei well yn llys ynadon Caerdydd ddydd Mawrth ar gyhyddiad o ymosod ac mae disgwyl i'r achos barhau am dri diwrnod.

Bydd yr ymosodwr yn cymryd drosodd gan Ryan Giggs sydd yn colli'r gêm yn erbyn Slofacia oherwydd anaf i linyn ei âr.

Ac mae rheolwr Cymru, John Toshack, yn cyfaddef nad yw Giggs yn debygol o fod ar gael i herio Cyprus bedwar diwrnod yn ddiweddarach.

Roedd mwy o newyddion drwg wrth i amddiffynnwr West Ham, James Collins, orfod tynnu yn ôl o'r garfan ag anaf i gesail ei forddwyd.

Ni chwaraeodd dros ei glwb yn Reading dros y Sul wedi iddo ddioddef anaf yn ystod y golled yng Nghwpan Uefa yn erbyn Palermo nos Iau.

Mae'r amddiffynwyr, Mark Delaney (pen-glin) a Sam Ricketts (boch) eisoes allan o'r gemau oherwydd anafiadau, sy'n golygu bydd Cymru heb dri o'r pedwar amddiffynnwr ddechreuodd eu gêm agoriadol yn erbyn Y Weriniaeth Siec ym mis Medi.

Nid yw Giggs wedi chwarae ers anafu llinyn ei âr yn ystod gêm Manchester United â Celtic yng Nghynghrair y Pencampwyr ar 13 Medi.

"Mae gen i deimlad y bydd yn dechrau ymarfer rhyw 48 awr cyn y gêm â Chyprus," meddai Toshack wrth BBC Cymru.

"Byddai hynny'n golygu ei fod yn debygol o golli'r gêm, ond cawn weld."

Bydd yn cael sgan yn ystod yr wythnos a bydd hynny'n ffactor mawr wrth benderfynu a fydd ar gael i wynebu Cyprus yng Nghaerdydd.

Heb Giggs, bydd angen i Toshack benodi capten newydd ac fe all y golwr, Paul Jones, gael y fraint wrth iddo ennill ei 50fed cap dros ei wlad.

Mae Toshack wedi ychwanegu amddiffynnwr yr MK Dons, Craig Morgan, i'r garfan wedi i Robert Page ymddeol o bêl-droed rhyngwladol.

Ac mae asgellwr Yeovil, Arron Davies, wedi ei alw i'r garfan yn dilyn y cyhoeddiad am Giggs.

Mae Toshack wedi penderfynu peidio galw ar John Hartson oherwydd amheuon ynghylch ei ffitrwydd a'i absenoldeb o gemau diweddar West Brom.

A bydd chwaraewr canol cae Crystal Palace, Carl Fletcher, yn aros â'i glwb am driniaeth ar anaf i'w ffêr gyda'r gobaith bydd y gallu ymuno â gweddill y garfan yn ystod yr wythnos.

Roedd ambell i beth positif i Toshack ddydd Sul wrth i'r golwr, Jason Brown, ddod oddi ar y fainc ac arbed cic o'r smotyn ystod buddugoliaeth Blackburn dros Wigan.